Претседателот на Србија, Александар Вучиќ потврди дека ќе оди во Тирана на Самитот на ЕУ и земјите од Западен Балкан. Во денешната изјава, Вучиќ рече дека не е сигурен дека ќе има некаква корист од неговото заминување во Тирана, но дека ќе има голема штета ако не оди, пренесува РСЕ.
„Можеби би покажал дека мојата суета е посилна и поголема, но секако дека би била голема штета за земјата, во поглед на привлекување инвестиции и се останато. На овој начин, без разлика што темата е Западен Балкан и што 20 од нив на неадекватен начин ќе почнат да зборуваат за санкции кон Русија и за проблемот со Косово, можеби моите колеги се во право кога велат дека е подобро да се слушне барем еден одговор отколку да не се слушне ништо“, рече Вучиќ.
Вучиќ пред неколку дена изјави дека никој од Србија нема да присуствува на состанокот поради одлуката на косовскиот премиер Албин Курти да го назначи Ненад Рашиќ за министер за заедници и враќање во Косово и поради реакцијата на ЕУ на таа одлука, која Белград ја оцени како блага.
Еден ден по неговиот неконтролиран настап на ТВ Пинк каде што искажа силни навреди за косовскиот премиер и новоназначените српски функционери во косовска влада, Александар Вучиќ изјави дека е подготвен, заедно со колегите од Владата, да ја разгледаат можноста за промена на одлуката да не се патува во Тирана,
Влезот на Рашиќ во косовската влада беше потврден помалку од еден месец откако српските претставници започнаа бојкот на институциите незадоволни од намерата на Приштина да започне процес на предрегистрација на возила со српски регистарски таблички.
Белград и Приштина со посредство на Европската унија (ЕУ) во меѓувреме постигнаа договор за надминување на кризата со регистарски таблички, но не и за откажување од бојкотот. Српските власти ја осудија одлуката на Рашиќ да биде дел од Владата на Косово.
Предходно, албанскиот премиер Еди Рама упати порака до српскиот претседател:
„Учеството на Самитот е единствениот пат што го има Вучиќ, бидејќи во спротивно тоа би било катастрофално за него и за Србија“.
Самитот во Тирана ќе се одржи утре, на 6 декември.
На самиот ќе присуствува и македонска делегација. Во Тирана на средби со државниците од регионот, но и со претседателот на Советот Шарл Мишел и еврокомесарката Фон Дер Лајен, како и премиери на државите членки на ЕУ одат премиерот Ковачевски, вицепремиерот Маричиќи шефот на дипломатијата Османи.
М. Д.
