Во недостаток на луѓе со мотив да излезат на протестите за одбрана на криминалот, кои лажно се претставуваат и именуваат како протести „за заедничка Македонија“, началниците не престануваат да измислуваат начини и методи за да покажат дека сè уште ги држат конците в раце и да ги наполнат улиците. Или, барем да ги направат да изгледаат дека се полни.
Оттука, во неделата, некому во штабот му текнало да организира „патриотско дефиле“, со велосипеди. Еколошки, нема што. Особено, кога ќе ви текне на светските рекорди во загаденост кои ги уриваа Тетово и Скопје овие години, на масакрот на шумите и дрвјата, на „Југохром“, на загадените реки…
И, бидејќи сето ова го знаат и граѓаните, очекувано, улиците на Скопје останаа полупразни, со пар стотици протестни велосипедисти. За да се скрие дебаклот, на помош беа донесени и административци, заедно со велосипедите од проектот за нивно изнајмување – како јавен транспорт на Град Скопје. Јавни ресурси, повторно беа злоупотребени и беа дел од партиското „протестно еко-возење” на тврдокорните ГДОМ-ови и ГИЗАМ-ови.
Пред некој ден, на улица се извадија комбајн и трактори. Неколку месеци претходно, автобусите на ЈСП се користеа за транспортирање на митингашите на владејачките партии. Но, џабе е сè. Дупките во „протестните“ колони за одбрана на криминалот и омразата – се сè поголеми. Тие не ги покриваат веќе ниту огромни знамиња, ниту светла, ниту добро определени агли за снимање од прорежимските камери, кои се обидуваат невешто да ја скријат празнотијата. И во бројките на поддржувачи и во суштината на приказната која се „продава“ на секоја медиумска тезга, но која никој веќе не ја купува.
Очајот е евидентен и голем.
Во овој краен стадиум, се вадат деца да плукаат и напаѓаат новинари, интелектуалци, политички противници… Се снимаат нивните реакции, за потоа да се објават во соодветна рамка за противникот – ако реагира е насилник, ако не реагира, ќе биде исплукан и предмет на јавен потсмев. Се заплашуваат и индоктринираат деца по училишта, по студентски домови, со крајно дрски лаги и пропаганда кои поттикнуваат омраза кон различните – по етничка, верска и политичка основа… Се праќаат насилници по домови на луѓе, да вознемируваат деца и семејства, кои демек, ги повикуваат на „заедништво и одбрана на татковината“.
Ех, лесно е кога има кој да гине за тебе, додека седиш во папучи, добро завален во фотелја и ги броиш милионите украдени од народот. Но, будали има сé помалку. Ептен видливи станаа дупкиве…
Ќе дојде ли време, на протест да се извадат џиповите и мерцедесите од стотици илјади евра, или има уште луѓе кои ќе го прифатат доброволно лудилото, да застанат во одбрана на насилници и криминалци? Па, Англискиот крал Ричард, за да избега од битка во која бил поразен, нудел кралство за коњ! Можат и нашите началници да ги понудат своите „куферчиња“ и „коњи“, во замена за поддршката на „народот“ – за спас на нивната кожа!
Оти, доста ја „спасуваа“ Македонија, односно себеси, со наши заеднички пари!