Премиерот Зоран Заев вчера се обрати на настанот по повод првата фаза од целосната реконструкција на игралиштето за фудбал и ракомет од спортскиот комплекс „Соколана“ во Куманово.
На настанот присуствуваа градоначалникот на Општина Куманово, Максим Димитриевски, директорот на Агенцијата за млади и спорт Наумче Мојсовски, како и други гости спортски работници од општината и од државата.
„Ми претставува навистина искрено задоволство да бидам дел од овој настан со кој ја означуваме како готова првата фаза од целосната реконструкција на игралиштето за фудбал и ракомет од спортскиот комплекс „Соколана“ во Куманово. Со наредните две фази од целосната реконструкција и обнова со кои ќе бидат опфатени самиот објект, а потоа и кошаркарското игралиште, нашата намера е да го вратиме првичниот сјај и функционалност на „Соколаната“ за која се врзани дел од најубавите спомени на граѓаните на овој град. Јас би додал дури и на граѓаните од целата земја кои доаѓаа тука да проследат некои од највозбудливите спортски или други манифестации кои беа тука организирани“, изјави Заев.
Денеска, и во оваа прилика, сакам уште еднаш да истакнам дека одлуката на Владата во 2019 година „Соколаната“ да ѝ биде вратена на користење на Општина Куманово, односно на граѓаните на овој град и на околните места, ја сметам за исклучително значајна.
Им го вративме објектот полн со спомени и историја на оние на кои им припаѓа – на граѓаните.
„Соколана“ е спортски објект во нашиот град, кој датира уште од доцните 20-ти години на минатиот век и период на кралство Југославија, со зачетоците на Соколското движење, не само на просторите на Куманово, туку и на тогашна Европа.
„Водени од респектот кон сентиментите и меморијата поврзана со овој прекрасен објект, како Влада, преку Агенцијата за млади и спорт, ја поддржавме неговата обнова и ставање во полна функција за да го вратиме некогашниот дух на спортски ентузијазам и да создадеме уште едно место за спортски активности на младите и на сите граѓани“, изјави Заев додавајќи дека Куманово во времето на режимот беше целосно запоставено и воопшто не постоеше на агендата за проекти од страна на тогашната власт.
Заев присуствуваше и на отворањето на првиот Младинскиот центар во Куманово, но и во државата согласно Законот за младинско учество и младински политики.
„Општина Куманово е позната како симбол на шареноликоста и пријател на младите луѓе и со отворањето на овој младински центар само го потврдува тоа. Со неговото отворање како и со формирањето на локалните младински совети, гарантираниот буџет за млади, не постои можност градоначалникот и локалната власт да ги слушнат младите и да не креираат политики и активности по нивна мерка“, потенцираше Заев во своето обраќање на отворањето на првиот младински центар во Куманово.
