Новото законско решение за правична застапеност мора да биде уставно и согласно препораките на Венецијанската комисија, вели премиерот Христијан Мицкоски, а од коалициониот партнер во владата ВЛЕН дека новиот закон веќе е во подготовка и од следната недела ќе се организриа јавна дебата.
Премиерот Христијан Мицкоски вчера одговорајќи на новинарско прашање во врска со најавите за новиот Закон за правична застапеност по укинувањето на „балансерот“, рече дека новото законско решение мора да биде уставно и согласно препораките на Венецијанската комисија.
Тој потенцира дека е потребно од кога ќе се искристализира решението кое ќе биде на основа на предлог, да се испрати на мислење во Венецијанската комисија и потоа да се донесе.
Во однос на ДУИ, Мицкоски нагласи дека на владина седница минатата година, членови на ДУИ ја усвоиле стратегијата за реформа во јавната администрација, која, како што нагласи, јасно вели дека ќе има бришење на „балансерот“.
Министерот за здравство Арбен Таравари вчера одговорајќи на новинарско прашање во врска со укинувањето на „балансерот“, уште еднаш го повтори ставот дека е потребен Закон за правична застапеност. Тој рече дека ВЛЕН веќе го подготвува законот, за како што најави, веќе следната недела ќе се одржи и јавна дебата.
Тој подвлече дека е потребен Закон за правична застапеност, не само за етничка категорија, туку за сите категории кои што се маргинализирани во општеството.
Уставниот суд на седница на 9 октомври годинава донесе одлука за укинување на „балансерот“ – алатката за вработување според национална припадност во државните институции.
Претседателот на Уставниот суд Дарко Костадиновски, на прес-конференција по седницата, образложи дека одлуката на судот е донесена со мнозинство гласови и нема да важи ретроактивно. Манипулација, ги нарече, тврдењата дека Уставниот суд укинал права на заедниците.
Со одлуката се укинати одредби од законите за јавен сектор и за јавна администрација, како и подзаконските акти со кои се операционализира темелната вредност соодветна и правична застапеност.
При градењето на својот став во овој предмет, Костадиновкси информираше дека Судот го имал предвид и Извештајот за 2023 година на Европската комисија, разни споредбени решенија, но и одлуки, како што е Пресудата на Врховниот суд на САД (Students for fair admissions v. President and fellows of Harvard College, 2023), пренесе МИА.
