Пред седум месеци сменетиот претседател на Сојузот на синдикати на Македонија, Живко Митревски, кого за време на минатата власт од бесот на членството, го чуваа специјалци, и кој по разрешувањето, од колегите синдикалци беше обвинет и дека е фалсификатор кој ја замајува јавноста, денеска побара оставка од министерката за труд и социјална политика, Мила Царовска, затоа што наводно, повторно „извршила упад во ССМ и направила обид тој да биде сменет по незаконски пат“!?
„ССМ како репрезентативна синдикална организација за јавниот и приватнот сектор, членка на Европската и Светска конфедерација на синдикати, сака да ја информира јавноста за уште еден обид за незаконска смена на раководството на Сојузот и правење на нов антисиндикален чин, историски скандал незапамтен во синдикалната историја во Европа и пошироко, повторно од Министерството за труд и социјална политика и од министерката Царовска“, изјави сменетиот Митревски, кој по скандалот во Сараево, сè уште лажно се претставува како лидер на ССМ, само затоа што одлуката за негово сменување, не ја призна претходниот министер за труд и социјала, со што беше спречено и впишувањето на легитимниот лидер на ССМ, Дарко Димовски во Централниот регистер. Митревски и понатаму не прифаќа интервјуа во живо, ниту покани за учество на дебати, но се обидува да ја убеди јавноста дека е сепак, легитимен претседател на ССМ.
„Со поништувањето на претходното Решение на Министерот за труд и социјална политика се кршат темелните Меѓународни конвенции…, во кои јасно се забранува мешање во синдикалното организирање и избори од страна на државната власт, повреда на член 37 од Уставот на РМ за право на слободно синдикално здружување, повреда на Законот за работните односи член 184-193, повреди на Статутот на ССМ член 7,8, 16 кои сите предвидуваат слобода на синдикалното организирање и слобода во изборот на органите и телата на Сојузот на синдикатите на Македонија“, изјави Митрески.
Тој ја обвини министерката за труд и дека врши „притисок и уцени врз раководството на ССМ да биде пацифизирано и да не се бори за работничките права, а посебно да се пацифизира борбата за барање за повисоки плати и во јавниот сектор, плати за администрацијата, војската, полицијата, правосудството и другата администрација“.
„Поради сите овие против законски дејствија, доколку не биде под итно повлечено противзаконското Решение бараме итна и неотповиклива оставка на Министерката за труд и социјална политика Мила Царовска за која е поднесена Кривична пријава за злоупотреба на службената положба и овластување казнива по член 353 од Кривичниот законик на РМ, а доколку тоа не го направи, бараме од премиерот Зоран Заев под итно да ја разреши и да овозможи нормално функционирање на синдикалното движење во Република Македонија“, порача самонаречениот лидер.
Иако зад него не стои членството на синдикалните организации, сменетиот Митревски се закани и дека доколку веднаш не биде повлечено решението на Царовска за негова смена, ССМ ќе организира масовни протести и штрајкови!
