Categories

МИСТЕРИЈА Затворите во државата како „логори на смртта“

Смртта на осуденикот Беким Демир, во затворот во Идризово, под засега нејасни причини, е уште еден белег за лошите услови во затворите во Македонија. Според некои медиуми причината за смртта била наводно предрозираност од лекови и наркотици. Директорот на Управата за извршување на санкции, Јовица Стевановиќ, за ЦИВИЛ Медиа вели дека ги чекаат резултатите и тогаш ќе може да даде официјален став од што починал осуденикот Демир. 
Досега починаа осум осуденици во КПУ Идризово, а за нивната смрт никој не понесе одговорност.

ЦИВИЛ Медиа, пред девет месеци објави сведоштво од Нехру Реџепов, таткото на 21 годишниот Андриас Реџепов од Шуто Оризари, кој почина во затворот во Идризово, кој тврдеше дека има сведок и сомнежи дека лица од службите во затворот се виновни за смртта на неговиот син.

ЦИВИЛ подоцна, од свои извори дознава дека Андриас Реџепов, наводно починал во затворот во Идризово од прекумерна употреба на таблети, односно дека, според обдукцијата, смртта настанала како резултат на интоксикација со метадон и бензодиазепин, но нема официјална потврда на ваквата информација.

За нечовечниот третман на осудениците во затворите во државата, ЦИВИЛ Медиа разговараше со семејството на 25 годишниот осуденик Ердал Јусинов, кој починал во затворот во Штип, односно затворот „Шести“.

Сведочењето на блиските и соседите на Јусинов, упатуваат на сериозни аномалии и пропусти во работата на затворската служба и лекарите. Наводно, тие не му пружиле помош цели четири часа, додека тој бил во претсмртна агонија.

Дехран Муратов

Print Friendly, PDF & Email