Дваесетина судии, од кои повеќето со подолг стаж во Кривичниот суд, од неразјаснети причини се прераспределени во Судот за прекршоци. Ваквата одлука ја донела в.д. претседателката на скопскиот кривичен суд Татјана Михајлова, која со годишниот распоред за работа на Основниот суд 1 во 2017 година, ги префрлила дваесетината судии од кривичниот во прекршочниот оддел, кој важи за „казнено одделение“ во судот.
Во јавноста веќе наголемо се коментира за јасната намера на претседателката Михајлова, како и за последиците од ваквата нејзина одлука.
За прераспределбата на судиите ЦИВИЛ Медиа разговараше со судијката Маргарита Цаца-Николовска, поранешна судијка на Европскиот суд за човекови права во Стразбур, и судијка и потпретседател на Уставниот суд на Босна и Херцеговина.
„Не ги знам причините коишто ја довеле претседателката во ситуација да ја направи оваа прераспределба, можеби таа има некои аргументи, но од аспект на граѓанин и судија којшто ги познава законите во таа област, ваквата одлука укажува на постоење на непочитување на стандардите за независно судство. Очигледно е дека овие судии работеле по одредени предмети и донесувале одлки кои се позитивен одговор на барањето на Специјалното јавно обвинителство“, вели Цаца-Николовска.
За судиите кои се прераспределени да одлучуваат по предметите на СЈО, Николовска вели дека, ваквиот избор на судии не е во насока на создавање независно судство, туку напротив, во насока на демонстирање на работа по налог на одредени лица, односно, по налог на владеачката гарнитура.
„Очигледно е дека постои некаков страв од постапување по овие предмети, врзани со прислушуваните разговори. И тој страв оди до таа мера што веќе се бираат, односно, се оценуваат судии кои можат да бидат од една страна поволни за нив, а од друга страна, се тргаат судиите кои, според нивното мислење, ќе ги застапуваат правните елементи во утврдување на криминалната или кривичната одговорност. Без разлика дали постои или не, веднаш се создава сомнеж дека одредени судии од ваквото распоредување се поповолни за владеачката гарнитура“, изјави Цаца-Николовска за ЦИВИЛ Медиа.
„Јас верувам дека вакви вонредни префрлања се без согласност на судиите кои се префрлени, а тоа укажува на многу голема негативност, и негативно очекување во делот на судската разврска на предметите коишто ги презентира и по кои постапува СЈО! Компаративната анализа во делот на мерките кои што за одредени предмети се на еден начин применувани, а за други предмети на друг начин, сето тоа укажува на тоа дека апсолутно не се постапува по забелешките не само на Прибе, туку и по забелешките од сите извештаи, години наназад од Европската комисија, и по забелешките на голем дел од невладиниот сектор“, смета Цаца-Николовска
На коментарот за прераспределувањето на поранешниот претседател Владимир Панчевски во Одделот за организиран криминал, таа вели: „Самиот поранешен претседател, кој исто така, покажа одредена зависност не само со неговите постапки, туку и со дел од неговите изјави, и неговото повторно ставање на место да постапува по тие предмети, гледано од страна, покажува слика на голема партизација на судството“.
На списокот на прераспределени судии се наоѓаат имиња на судии кои се потпишаа на петицијата против експретседателот Панчевски, кој со новиот распоред е префрлен да суди во Одделот за организиран криминал и корупција. Со новиот распоред, кој судиите го добиле вчера, и на кој сé уште не стои потписот на претседателката Михајлова, прераспределени се Весна Димишкова, судијката кој издаде наредба за претрес на Специјалното јавно обвинителство (СЈО) во во Управата за безбедност и контраразузнавање (УБК) и Славица Андреевска, која му одреди мерка притвор на градоначалникот на Битола, Владимир Талески.
Покрај овие две судијки, прераспределени се сите 13 судии кои поднесоа петиција против Владимир Панчевски, а подоцна беа повикани да дадат изјави и во Судскиот совет. Меѓу нив, се долгогодишниот кривичар Седат Реџепагиќ, како и Марија Клетничка и Оља Ристова.
За сметка на „казнетите“ судии, поранешниот претседател Владимир Панчевски и кандидат за нов претседател на Кривичниот суд е награден, односно распореден за судија во Одделот за организиран криминал, каде се судат предметите на СЈО. И „сваровски“ судијката – Лидија Петровска е прераспределена од Кривичниот во Одделот за организиран криминал. На листата судии кои ќе одлучуваат по предметите на СЈО се најде и судијката Моника Бахчовановска, сопруга на Владимир Бахчовановски, висок функционер на ВМРО–ДПМНЕ.
Маја Ивановска
