Украинскиот претседател Володимир Зеленски на во денешното обраќање изјави:
„Една од главните задачи за нас денес беше организацијата на хуманитарни коридори. Суми, Тростијанец, Краснопиља, Ирпин, Буча, Гостомел, Изјум. Речиси 40.000 наши луѓе се веќе евакуирани во текот на денешниот ден. Конечно се на безбедно во Полтава, Кијив, Черкаси, Запорожје, Днипро, Лавов. Успеавме исто така да испорачаме и хуманитарни камиони: стотици тони храна и лекови
Правиме се за да ги спасиме нашите луѓе во градовите кои непријателот само сака да ги уништи. Имајќи ја предвид работата на хуманитарните коридори во претходните два дена, веќе евакуиравме околу сто илјади луѓе.
Ама Мариупол и Волноваха остануваат целосно блокирани. Иако направивме се што е потребно за да функционира хуманитарниот коридор, руските војници не го прекинаа огнот.
И покрај ова, сепак решив да испратам конвој камиони во Мариупол. Со храна, вода, лекови. Благодарен сум им на сите возачи – храбри луѓе кои беа подготвени да ја исполнат оваа мисија. Исклучително важна мисија.
Но, окупаторите извршија тенковски напад токму таму каде што требаше да биде овој коридор. Коридор на животот за Мариупол.
Тие го направија тоа свесно. Тие знаеја дека го прекинуваат конвојот. Имаат јасна наредба да го држат Мариупол како заложник, да го исмеваат. Постојано да го бомбардираат, постојано да го гранатираат.
Тие денеска ја уништија зградата на главниот директорат на Државната служба за вонредни состојби во Доњецката област. Веднаш до оваа зграда беше местото каде што жителите на Мариупол требаше да се собираат за евакуација.
Ова е отворен терор. Груб терор. Од искусни терористи. Светот треба да го знае ова. Мора да го признае ова. Ние сите си имаме работа со терористичка држава.
Но, како и да е, ние ќе се трудиме! Постојано! Ќе продолжиме да се обидуваме да ја донесеме во Мариупол помошта на нашиот народ, која толку очајно му е потребна. На украинците и украинките.
Окупаторите прават се за да го измамат нашиот народ во опколените градови.
Ја блокираат комуникацијата. Не дозволуваат откривање на информации. Државата прави се за да му помогне на нашиот град.
Се, за да им кажеме на жителите на Мариупол: ние се бориме. И нема да ја напуштаме оваа борба.
Затоа, доколку имате можност да разговарате со жителите на Мариупол, да им пишете, ве молиме да им ја пренесете вистината. Потсетувајте ги дека Украина е со нив со сето срце. И прави се за да ја запре тортурата на градот.
Руските пропагандисти денес значително оживеаја. И се трудеа многу.
Веројатно за да ги прикријат злосторствата на нивната војска во Украина. Злосторства против Мариупол. Против Донбас. Против Харкив. Против десетици други градови. Да ги покријат со нови обвинувања. Со ново-стари лажни вести.
Тие не обвинуваат нас… Пак нас! Дека наводно развиваме биолошко оружје. Наводно подготвуваме хемиски напад.
Ова многу ме загрижува, бидејќи повеќе од еднаш дознававме: ако сакате да знаете за плановите на Русија, погледнете за што ги обвинува Русија другите.
Видете, расфрлањето на ваквите обвинувања во руските медиуми само по себе покажува дека тие се способни за тоа. Руската војска, руските специјални служби. Покажува што тие сакаат.
Тие веќе имаат направено такви работи во други земји. Исти такви работи! Самите најавија, самите организираа, самите се жалеа. И самите ќе направат пак.
Повторно и повторно. Доколку не бидат запрени.
Како ја растргнаа Молдавија со Придњестровје. Како Грузија беше растргната со Абхазија. Како Украина беше растргната со Донбас и нашиот Крим.
А не обвинуваат нас! Оние кои станаа жртви. Оние кои се принудени да се бранат. Да се борат за своето право на живот.
Тие самите доаѓаат кај нас со тенкови и со ракети. Го земаат туѓото. Нашето. Заземаат.
Дури и се срамат да ги покажат своите офицери! Ги кријат своите генерали. Кријат од сопствениот народ дека испраќаат регрути во оваа војна, само за инвазивните сили да можат да направат повеќе.
А ние сме виновни! Нас не обвинуваат за напади врз наводно мирната Русија.
И сега што? Кои се овие обвинувања за подготовка на хемиски напади? Дали решивте да ја „дехемиизирате“ Украина? Со што? Со амонијак? Фосфор? Што уште ни подготвивте? Каде ќе удирате со хемиско оружје?
Во породилиштето во Мариупол? Во црквата во Харкив? Во детската болница „Охматдет“? Или во лаборатории, од кои повеќето се останати уште од советско време и се занимаваат со обична наука. Обична! А не со воена технологија.
Ние сме адекватни луѓе. Јас сум Претседател на адекватна држава, адекватен народ. И татко на две деца. И никој во мојата земја не развива никакво хемиско или друго оружје за масовно уништување. И целиот свет го знае тоа. Вие го знаете тоа. И ако направите нешто такво против нас, ќе добиете најстрог санкционен одговор.
Претседателот Зеленски каша дека потпишал неколку важни укази, меѓу кои и за доделувањето на титулата Херој на Украина на тринаесет наши бранители:
Потполковникот Литун Андриј Миколајович. Постхумно. Тој загина покривајќи ги нашите војници и херојски одваќајќи ја офанзивата на непријателот.
Капетанот Корпан Олександр Богданович. Постхумно. Тој ги спаси нашите војници и цивилните домови кога одврати од нив авион што паѓаше.
Помладиот поручник Блоха Јуриј Игорович. Постхумно. Во битките во Миколајивската област херојски ги штител сограѓаните, спасувајќи ги нивните животи.
Постариот наредник Ивашко Андриј Олександрович. Постхумно. За време на ракетно гранатирање, тој по цена на својот живот лично даваше информации за дејствијата на непријателот.
Помладиот наредник Волков Евгениј Володимирович. Постхумно. За храброста и херојството при евакуацијата на ранетите во Доњецката област, за спасувањето на нашите војници.
Генерал-мајорот Николјук Виктор Дмитрович. Тој вешто ја водеше одбраната во североисточниот правец, благодарение на што успеа да го спречи заземањето на Чернигив.
Полковникот Хода Леонид Олексијович. За време на војната, под негова команда, беа уништени повеќе од 50 возила на непријателот.
Потполковникот Пономаренко Вјачеслав Анатолијович. Благодарение на неговите дејствија, значителен број опрема и војници на непријателот беа уништени во градот Гостомел.
Потполковникот Јаковенко Олександр Олексијович. Тој ги извлече своите единици од непријателскиот артилериски оган, благодарение на што го сочува персоналот и продолжи успешно да ја брани Доњецката област.
Мајорот Бова Евгениј Петрович. За херојска одбрана на Мариупол и држење позиции во постојаните напади на непријателот.
Капетанот Боечко Васил Василјович. За исклучително успешна елиминација на опремата и живата сила на непријателот.
Наредникот Мороз Олег Романович. Благодарение на неговите херојски дела, беше успешно запрена офанзивата на непријателот во Луганската област.
Морнарот Самофалов Валериј Михајлович. Во една битка, за прв пат во историјата на оваа војна, тој собори три непријателски жиродини одеднаш.
Зеленски додава и дека потпишал и указ со кој се доделуваат ордени за лична храброст на 39 Национални гардисти, 31 полицаец (девет постхумно), 14 граничари (четворица постхумно) и 23 вработени во Државната служба за вонредни ситуации.
Денес чинот бригаден генерал им се доделува на:
Нечаев Олег Олександрович. За успешна одбрана на Кијивската област.
Лишчински Владислав Вацлавович. За исклучително успешни дејствија против непријателот во Херсонската област.
Гуцол Володимир Володимирович. За успешно уништување на непријателските воздушни трупи во Василков.
Демјанчик Григориј Петрович. За успешно организирање на кадровската обука за нашите воени единици.
За крај. Зеенски изјави:
Денес и утре во Европа продолжуваат дискусиите за иднината на Украина во ЕУ.
Сметам дека нашиот народ, нашата држава, нашата армија веќе направи се за да сакаат да не видат таму. Меѓу еднаквите. Да бидем поканети таму.
Ова е завршен испит за Европа.
Меѓу лидерите на државите има и такви кои не поддржуваат. А има и такви кои се поддржуваат само себеси.
Но, ние гледаме како народите од сите европски земји се однесуваат со нас. И ова е главната работа.
Затоа што сигурно знам: ако луѓето одлучуваа за нашето членство во ЕУ, тие дефинитивно би го избрале народот на Украина.
Денес, кога ја гледам поддршката на народите на секоја земја на плоштадите во европските метрополи, знам дека украинскиот народ е веќе во Европската унија.
А, политичарите … сигурен сум дека ќе се прилагодат. Пожелно што е можно побрзо.“
