Во четврток (16.11.) во амфитеатарот на универзитетот ФОН ќе се одржи промоција на книгата „Живот во кутија“ на новинарот Томислав Кежаровски, провокативно, трогателно, но пред сè, искрено сведоштво за речиси двете години, поминати зад решетки и во куќен притвор и за причините и последиците на хоророт што го преживуваа тој и неговото семејство…
Случајот „Кежаровски“ беше еден од лостовите преку кои се уриваше недемократската власт на ВМРО-ДПМНЕ и на ДУИ. Обвинет и осуден на 4,5 години затвор, за наводно обелоденување на идентитет на заштитен сведок, кој самиот на суд призна дека дал лажен исказ под притисок на полицијата, новинарот Кежаровски помина седум месеци во притвор во „Шутка“ и 15 месеци во куќен притвор.
Под притисок на дел од домашната јавност и на меѓународните организации кои се борат за човекови права и за слобода на јавното изразување, Кежаровски кој беше можеби медиумски најекспонираната жртва, меѓу стотиците страдалници од безумието кое цела деценија ја туркаше Македонија кон бездната, излезе од затвор, означувајќи го симболично – почетокот на крајот на режимот.
Свесен „за потребата да се насликаат сите нијанси на несреќата со која таму се борат ‘обичните луѓе’“, Кежаровски напиша книга која, како што во предговорот на книгата, пишува новинарот Синиша Станковиќ, не е само „дневник од зад решетки или есеи за слободата, за новинарството, за професионализмот и за достоинството, или белешки за сопствените преиспитувања за смислата на етиката, на моралните норми и на жртвувањето за повисоки цели, или романтизирана автобиографија, или лично сведоштво за еден срамен период од македонската историја, во која тој, ни крив ни должен, беше и паталец и жртва, или роман-фикција, низ која ќе се преплетуваат горките искуства кои никого не можат да остават рамнодушен…“ Зашто, книгата „Живот во кутија“ е сето тоа, во едно, оти, Кежаровски „имаше, и сè уште има, незапирлив порив да раскаже, да вресне, да обвини, да посочи на грешките“…
Или, како што ќе напише авторот на поговорот во книгата, новинарот Ѕвездан Георгиевски, „Кежаровски се решил на еден вонредно храбар потег – да ја сподели целата своја мака, фрустрација, своите јадови и своите понижувања, со еден релативно широк круг читатели. Кежаровски, секако, е мајстор на пишаниот збор. Тој цел живот е новинар во таканаречените пишувани, односно, печатени медиуми и не е ни чудо дека владее со занаетот на пишувањето. Меѓутоа, овој пат, не станува збор за вообичаена новинарска задача. ‘Живот во кутија’ не е само исповед, туку една соголена, потресна и напната приказна која се чита во еден здив. Своевиден прирачник за преживување и таму каде што никогаш не сте мислеле дека ќе се најдете“.
Аворт на цртежот на насловната страница и на идејното решение на корицата е Игор Стевковски – Стевац, а на фотографиите во книгата, фоторепортерите Наке Батев, Томислав Георгиев и Маја Златевска.
