„Ако се загрозува ратификацијата на протоколот за членството во НАТО, тогаш изборите да се одложат пред истите да се закажат и пред да се распушти Собранието“, вели правникот Насер Зибери, сметајќи дека ова е единствената опција што им останува во располагање на политичките партии.
Тој вели дека распуштањето на Собранието значи прекин на мандатот на пратениците, а Уставот не предвидува можност по распуштањето на Собранието да се свикува пак седница со истиот состав. Коментирајќи ги изјавите на лидерот на опозицијата Христијан Мицкоски и претседателот Стево Пендаровски, Зибери тврди дека членот 63 е дециден во тоа што распуштеното Собрание може да се свикува само во воена или вонредна состојба.
Ратификацијата на протоколот за членство во НАТО, според експертот по право, Насер Зибери, иако е важно, сепак не е ниту воена ниту вонредна ситуација. Затоа тој им препорачува на политичките партии проценките да ги прават на време и евентуалната одлука да ја донесат пред да се распушти Собранието.
“Изборите може да се одложат во секој момент, додека Собранието не е распуштено, бидејќи одлуката за самораспуштање пратениците ја носат со апсолутно мнозинство, односно 61 гласа за од 120 колку се вкупно пратеници. Сè додека Собранието не е распуштено, датумот 12 април може да се пролонгира во секој момент”, изјави Зибери.
Зибери цени дека лидерите на политичките партии се избрзале со договорот за предвремените парламентарни избори и истиот е постигнат под влијание на разочарувањето по неуспешниот самит на ЕУ. Според него, изборите на 12 април го загрозуваат не само членството во НАТО туку и добивањето датум за преговори со Европската Унија.
Тој потсетува дека во новата стратегија за реформи во ЕУ може да се стават и нови услови кои би се барале да се исполнат до Самитот во мај, било тоа да се законски измени или слични одлуки. Во таква ситуација Зибери вели дека земјава може да биде без Собрание, ќе нема кој да ги изгласа новите промени или услови до мајскиот Самит кој ќе се одржи во Загреб, затоа може да не добиеме датум за преговори, овој пат по наша грешка.
“Се поставува прашањето, што ако Франција предвидува нови правила за земјите кандидати за почеток на преговорите, а во меѓувреме ние имаме распуштено Собрание, незавршени избори, а конституирањето на Собранието до тогаш не е направено. Во ваква ситуација Северна Македонија може да не добие датум ни на следниот Самит кој во мај ќе се одржи во Загреб и така почетокот на преговорите ризикуваме да се одложи до неизвесност. Мислам дека лидерите на политичките парти и претседателот требало да ги имаат предвид сите ситуации пред да донесат одлука за закажување датум за предвремени парламентарни избори”, изјави Зибери.
Дебатата за одложување на изборите се отвори по изјавата на премиерот Заев кој најави можност за одложување на парламентарните избори доколку Шпанија не стига на време да конституира Собрание и да го ратификува протоколот за членство на нашата земја во НАТО. Протоколот потоа треба да дојде во Скопје за ратификација во македонското Собрание, а во случај на задоцнување од страна на Шпанија, нашето Собрание ќе биде распуштено.
Против изјавата на Заев, излезе лидерот на опозицијата, Христијан Мицкоски, кој тврди дека во таква ситуација нема потреба да се одложат изборите туку може да се свикува вонредна седница само за ратификација на протоколот за членство во НАТО.
И претседателот на земјата, Стево Пендаровски тврдеше дека исто како што постои техничка Влада може да има и техничко Собрание и според него нема потреба да се одложат изборите.
Но, претседателот на Собранието, Талат Џафери излезе против двете верзии. Тој беше дециден дека по распуштање на Собранието не може да се реализира ниту една од двете сценарија, ниту да се свика седница за одложување на изборите, ниту за ратификација на протоколот за НАТО.
Арбен Зеќири
