Во Казнено–поправниот дом „Идризово“, во затворската амбуланта, во саботата попладне починал затвореникот М. С. (46), откако претходно се жалел на болка во градите. Ова е трет случај на починат осуденик во последните десетина денови!
Претходно, на 10-ти и 11-ти јануари, починаа 73 -годишникот М.А. од Гостивар и 56 -годишникот С.Р од гостиварското село Речане, кои служеле затворска казна во Идризово.
Во канцеларијата на Народниот правобранител го подготвуваат Извештајот за 2016-та година, во кој ќе биде опфатена и состојбата со затворите во Македонија. Оттаму редовно се залагаат за опфаќање на здравствената заштита на осудениците во системот на јавното здравство, но досега немаше адекватна реакција на надлежните за таквите барања
Минатата година, по објавувањето на веста за аболицијата на претседателот Ѓорге Иванов, Народниот правобранител Иџет Мемети, изјави дека постои сомневање за вршење притисок врз затворениците и со тоа им е ускратено правото на штрајк. Екипите на Омбудсманот се обврзаа дека уште поактивно ќе ја следат состојбата во затворите и на затворениците ќе им ги појаснуваат нивните права и обврски.
Според извештајот на Совет на Европа од март 2016та година, смртноста на затворениците во Македонија е 45,7 затвореници на 10.000, а во Европа средната смртност е 31,3. Самоубиствата претставуваат 3,5 на 10.000, во Европа средната бројка е 5,4. Истиот извештај, посочува дека македонските затвори се меѓу најгусто „населените“ во Европа. Заклучно до први јануари 2016та година, вкупниот број на затвореници во земјава изнесувал 3.427 лица.
На веб-страницата на Управата за извршување санкции нема податок за бројот на починатите лица во затворите во Македонија.
Според извештаите на Народниот правобранител, затворениците покрај лошите услови во поглед на здравствената заштита и животните услови, воопшто, се соочуваат и со притисоци со кои им се ускратуваат основните човекови права.
