Пендаровски во Брисел: Во изминативе две години редовно испорачуваме добри вести од регионот
Претседателот Стево Пендаровски, денеска во Брисел, по средбата со претседателот на Европскиот совет, Доналд Туск, изјави дека Европската унија има можност да покаже лидерство и визија за иднината на нашиот регион со тоа што ќе и додели датум за преговори на Македонија.
„Граѓаните на Северна Македонија не бараат незаслужена награда, туку заслужена шанса за изградба на европска држава со праведно, хумано и напредно општество“, додаде Пендаровски.
ОБСЕ со критички извештај за работата на СЈО
Шефот на Мисијата на ОБСЕ, Клеменс Која, денеска ги повика политичките партии да постигнат согласност и да овозможат СЈО да продолжи непречено да работи. Според ОБСЕ, дел од предметите на СЈО се преплавени со докази и со сведоци, а СЈО не ги предало на одбраната прислушуваните разговори како докази. Денеска ОБСЕ го објави Вториот преоден извештај за работата на СЈО, на 80 страници, со анализа на набљудуваните судски предмети во периодот помеѓу ноември 2016 и ноември 2018 година, односно во двете години од почетокот на првиот судски процес на СЈО.
НРТВ и АВМУ ќе добијат ново раководство, СЈО неопходен за државата
Премиерот Зоран Заев и министерот Роберт Поповски на синоќешната дебата посветена на „Две години Влада – Одговорно пред граѓаните“, на Отворено на прашањето за промените коишто следуваат во Националната радио телевизија рекоа дека низ една транспарентна и отворена постапка ќе се случуваат промените за да се изнајдат најквалитетните решенија.
„Ја повикувам јавноста и медиумите да го следат изборот на програмски совет на НРТВ и АВМУ, следува процес во Собранието“, рече министерот Поповски.
„Програмскиот совет на НРТВ ќе се избере на транспарентна постапка кој што ќе назначи директор и уредници. Изборот ќе оди слично како и за ДКСК, преку бодување и јавност“, додаде премиерот Заев.
Заев на прашањата посветени на реформите во правосудството со акцент на СЈО истакна дека законот за Јавното обвинителство, со место на СЈО во обвинителскиот систем и треба на државата, и дека законот разработува само принципиелни решенија без да допре во независноста на поставеноста и работата на Јавното обвинителство и на сите структури во него.
„Ги поставуваме принципите на институционална посветеност на целиот обвинителски систем во земјата. Не смееме заради политички интереси да се доведеме во ситуација да дадеме амнестија за криминални дејанија кои биле започнати. Опозицијата бара да запрат постапките и да се поништат доказите“, изјави Заев.
Eсад Рахиќ е нов директор на затворот Шутка, Димовски – шеф на Агенцијата за национална безбедност
Директорски позиции за Виктор Димовски и на поранешниот пратеник од редовите на СДСМ, Есад Рахиќ. Oдлуките за двајцата поминаа на седница на влада, и се предвидува поранешниот разузнавач и досегашен државен секретар во МНР, Димовски да седне на челната позиција во новоформираната агенција за национална безбедност. Есад Рахиќ пак е новиот директор на истражниот затвор во Шутка.
„Ел Чека“ не чека, пушта бомби каде се местат судии и се дискредитираат академици
И покрај многуте хакерски напади и репорти заради кои се затворија неколку профили на кичевчанецот Ел Чека, тој не дочека ниту еден ден туку отвори нови профили на Фејсбук и веб страници. На нив Ел Чека објави нови бомби и тоа уште појаки разговори со поскандалозни содржини. Во еден од разговорите каде се вели дека се слушаат двајца највисоки функционери од ДУИ, се слуша како местат избор во судската власт. Услов за именување на судија, според разговорот е семејството на судијата да гласа за ДУИ, а не „за другата партија” како што се слуша во разговорот. За ова тие меѓусебе бараат цврсти гаранции од трет функционер од истата партија кој е роднина на еден од кандидатите судии.
Северна Македонија е на 65-то место на Глобалниот индекс на мирот
Сподред Австралискиот институт за економија и мир кој го објави годинешниот глобален индекс на мирот, врз чија основа се рангирани земјите од „најбезбедна“ до „најнебезбедна“, Северна Македонија е рангирана на 65-то место. Во споредба со периодот од пред една деценија, светот во 2019 е најбезбеден во последниве пет години според најновото истражување на Институтот. Индексот се пресметува врз основа на 23 фактори, меѓу кои и внатрешни и надворешни конфликти, воени трошоци, тероризам, убиства и криминал. Единаесетта година по ред Исланд е најбезбедна земја во светот, а на последното место на листата, исто како и лани, е Авганистан.
Д. Муратов
