ВЕСТ НА ДЕНОТ: Судењето за „ТНТ“ се враќа од почеток
Поротничката Лилјана Ивановска Кочковска денеска не се појави на рочиштето за случајот “ТНТ”, бидејќи, како што рече судијата Огнен Ставрев, си поднела оставка.
„Добивме известување од поротничката дека дава неотповиклива оставка, бидејќи ѝ истекол мандатот, но и поради здравствената состојба. Судењето ќе почне од почеток“, рече судијата Ставрев.
Веднаш по одложувањето на денешното рочиште Кривичниот суд преку соопштение истакна дека нивните предупредувања за евентаулани притисоци и закани како и обиди за одолговлекување на постапката во предметот „ТНТ“, а за кои Судот побара да бидат преиспитани од надлежните институции, денеска излегоа на виделина.
БЛИЦ КОМЕНТАР: ТРИКОВИТЕ ПРОТИВ ПРАВДАТА
Џабир Дерала: Груевски креваше згради во воздух, тепаше, затвораше, прогонуваше и убиваше како ќе му текне, а предметите против неговиот режим се уриваат со евтини фори и фазони.
ИЗЈАВА НА ДЕНОТ
Хајредини: Техничката влада има задача да води предизборна кампања
ПОЛИТИЧКИ ОКЕЈ КОРАЛ
Препукувањата меѓу двете најголеми политички партии продолжуваат со несмалено темпо. Откако дополнителната заменик министерка во МВР Славјанка Петровска не ја потпиша одлуката за назначување на Ристо Ставревски за шеф на СВР – Скопје, техничкиот министер за внатрешни работи Наќе Чулев денеска поднесе барање за мислење до Државната изборна комисија.
По барањето на Чулев, ДИК ќе одлучува во текот на утрешниот ден. СДСМ и ВМРО-ДПМНЕ не најдоа заеднички јазик ниту околу Законот за поништување на лустрацијата. Опозициската ВМРО-ДПМНЕ соопшти дека нема да го поддржи Предлог-законот, додека СДСМ го критикуваше ваквиот став потенцирајќи дека опозициската партија „ја злоупотреби лустрацијата за политички, партиски, па дури и лични цели“. Министерката за правда, Рената Дескоска, пак, побара ВМРО-ДПМНЕ да престане да бара дополнителни основи за опструкција, а претседателот на Комисијата, Александар Кирацовски на прес-конференција во Собранието изјави дека „кон опструкцијата на законот“ на опозициската ВМРО-ДПМНЕ, попладнево се приклучиле и пратениците од ДУИ и ДПТ.
Претседателот на Собранието, Талат Џафери, пак, рече дека тој нема никаков проблем со поништувањето на лустрацијата. Џафери на прес конференција ги најави и измените и дополнувањата на Законот за Собранието кои пратениците денеска ги доставија до Собранието. Ова законско решение е првиот чекор кон целосно осамостојување и независност на Собранието, како во однос на собраниската служба и буџетот, така и на внатрешното обезбедување. Измените и дополнувањата се однесуваат на собраниската администрација.
НЕ ПОМАЛКУ ВАЖНО
Вработениот во Централниот регистар на Северна Македонија, Емил Јакимовски денеска доби отказ од институцијата. Директорката на Централниот регистар, Марија Бошковска Јанковски донесе Решение за престанок на работниот однос на лицето Емил Јакимовски поради, како што соопштија доцна синоќа од оваа институција, суштествени повреди на одредбите од Колективниот договор на Централниот регистар. По објавите за заканите од Јакимовски кон новинари и активисти уследија реакции со барања за одговорност. Новинарките ги пријавиле заканите во МВР.
ОСКАРОВСКИ НОМИНАЦИИ ЗА МЕДЕНА ЗЕМЈА
Историски ден за македонската кинематографија. „Медена земја“ е номиниран за Оскар во две категории: најдобар документарец и најдобар странски филм.
ЦИВИЛНИ ВЕСТИ
Како и досега, ЦИВИЛ интензивно продолжува со своите активности на терен. На самиот почеток на новата 2020 година предвидени се два семинари наменети за Полошкиот и Југоисточниот плански регион, а во тек е аплицирањето за учество.
Семинарот во Гостивар ќе се одржи на 25 јануари, а право на учество имаат апликантите од општините во Полошкиот плански регион: Гостивар, Тетово, Врапчиште, Брвеница, Желино, Боговиње, Теарце, Јегуновце, Кичево, Маврово и Ростуше.
Вториот, пак, ќе се одржи на 8 февруари во Струмица, овој семинар е наменет за граѓанките и граѓаните на Југоисточниот плански регион. Право на учество на семинарот во Струмица ќе имаат граѓанките и граѓаните на општините Струмица, Василево, Босилево, Ново Село, Конче, Валандово, Дојран, Богданци и Гевгелија.
ОД НАШ АГОЛ
„Медена изборна земја“ е насловот на денешната колумна на Орданоски во која тој ги споредува дневно политичките настани во земјата со борбите во холивудските блокбастери, заклучувајќи дека, сепак, на прсти се бројат филмовите во кои победиле негативците.
Зоран Иванов во својата колумна „Партиските политики подалеку од спортот“ прави осврт на Европското првенство во ракомет и однесувањето на поедници од ракометната репрезентација на земјата.
Џабир Дерала „испука рафал“ кон правосудството. „Груевски креваше згради во воздух, тепаше, затвораше, прогонуваше и убиваше како ќе му текне, а предметите против неговиот режим се уриваат со евтини фори и фазони“, пишува Дерала во денешната колумна „Меѓу руската салата, чоканчето и судското чеканче“.
Маја Ивановска
во соработка со: Биљана Јордановска, Сашо Орданоски, Зоран Иванов и Џабир Дерала
Сите права се задржани. Услови за користење, авторски права и заштита на приватноста.
