ВЕСТ НА ДЕНОТ: МАРШ „ЧЕКОРИМЕ ДО ПРАВДА“
Претседателот на СДСМ Зоран Заев на денешната прес-конференција ги повика сите граѓани кои се за правда, правичност и силна правна држава да се приклучат на утрешниот марш за правда „Чекориме за правда“ во организација на СДСМ.
„Ве повикувам сите, приклучете се во борбата за правда. Денешната победа нека биде мотив, заедно да постигнеме многу повеќе. Заедно да чекориме во изградбата на правната држава. Затоа, ве повикувам сите правдољубиви луѓе, утре – понеделник, во 18 часот, пред Собранието на Република Северна Македонија, да чекориме во име на правдата. Ве повикувам да се приклучите кон Маршот “Чекориме за правда”. Заедно да чекориме од местото каде се изгласа овој толку важен закон, од Собранието, до местото каде треба да ги видиме конечните правни разрешници – судот Се гледаме утре во 18 часот пред Собранието, чекориме за правда“ повика Заев.
„Заедно ќе продолжиме напред со одлучни чекори за вистинска и неселективна правда. За европска перспектива, но и одговорност за сите кои го прекршиле законот! За напредок, развој и членство во НАТО и ЕУ, заклучи Заев.
БЛИЦ: Иста предизборна пропаганда, но со друга содржина: Африканци наместо џихадисти
Пропагандата е пуштена на најјако, едните ќе шират параноја и ќе ги плашат граѓаните дека црнчиња ќе им шетаат по дома, други преку своите портали ќе шират Албанофобија, дека Албанците ќе бидат на личните карти, додека Македонците не. На претходните избори граѓаните ги плашеа со некаква „Тиранска платформа и кантонизацијата, ви текнува?!
ИЗЈАВА НА ДЕНОТ
Шекеринска: Денеска пред седиштето на НАТО се прави место за јарболот на нашето знаме
ПОЛИТИЧКИ ОКЕЈ КОРАЛ
Заврши сагата со Законот за ЈО, Собранието и официјално се распушти. Останува да видиме што покрај црната пропаганда ќе понуди предзиборието… Прочитајте повеќе – ТУКА.
НЕ ПОМАЛКУ ВАЖНО:
Бојан Јовановски – Боки 13 се гледал со поранешната специјална обвинителка Катица Јанева и одел кај неа, во нејзиниот дом, ова го покажале снимките од ПИ мерките кои денеска се прикажуваат во судница на рочиштето за предметот „Рекет“ во кој обвинети се Боки 13 и Јанева. Според одбраната во снимките нема ништо спорно.
До изборите министерското место за труд и социјална политика во техничката Влада ќе остане празно откако ВМРО-ДПМНЕ до вчерашното распуштање на Собранието не даде нов предлог за оваа позиција по разрешувањето на техничката министерка Рашела Мизрахи.
Во државата недостигаат 536 пожарникари за да се достигне законски пропишаниот минимум, а просечната старост на противпожарните возила е 28 години, покажува истражувањето што го изработи Центарот за граѓански комуникации.
Лидерите решија да го вратат мандатот кај вас, обврска е на институциите да обезбедат услови за спроведување на фер, слободни и демократски избори на кои вие ќе го искористите вашето демократско граѓанско право и обврска, истакна денеска на прес-конференција претседателот на Собранието Талат Џафери, обраќајќи им се на граѓаните по вчерашното распуштање на Парламентот и распишување на предвремените парламентарни избори на 12 април.
Независниот академски синдикат (НАкС) во отворено писмо до премиерот Оливер Спасовски го изразува незадоволството од нерешениот проблем со исплатата на ветените 10 проценти од јануарската плата за вработените во високото образование и, како што наведува, „поради нечии лични интереси кои немаат допирни точки со заложбата за унапредување на положбата на вработените, се испроблематизира начинот на кој ќе се изврши ветеното покачување“.
Реализацијата на капиталните инвестиции во 2019 година е во рамките на просекот во изминатите 10 години или нешто над просекот, а јавниот долг е стабилизиран, оцени денеска министерката за финансии Нина Ангеловска.
ТЕМА НА НЕДЕЛАТА – ГОВОР НА ОМРАЗА
Предизборието во нашата земја во изминатата деценија, а особено во последните години се повеќе е пропратено со говор на омраза. Говорот на омразата е присутен во секојдневието, но својата кулминација ја доживува токму во пресрет на изборите. Поради тоа, темата за оваа недела на медиумската платформа на ЦИВИЛ е говорот на омразата, како една од алатките на црната пропаганда.
По тој повод ЦИВИЛ во четврток организира панел дискусија на оваа тема, наскоро со повеќе детали.
ЦИВИЛНИ АКТИВНОСТИ
ЦИВИЛ ги повикува своите членови, поддржувачи и учесниците на семинарите за граѓанско новинарство, набљудувачите на претходните изборни процеси, како и сите заинтересирани полнолетни граѓанки и граѓани да аплицираат за краткорочни изборни набљудувачи. (ЛИНК ДО АПЛИКАЦИЈА)
Рокот за пријавување за краткорочни изборни набљудувачи во составот на ЦИВИЛ е до 20 февруари, 12 часот напладне.
СЛОБОДНА ЗОНА
„Факт е дека ВМРО-ДПМНЕ на овие избори излегува пораспадната и понеединствена, каква што одамна не била – впрочем, и завршните собраниски гласања за Законот за Јавно обвинителство и оној за одбрана го покажаа тоа – со раководство коешто целиот свој оптимизам го темели врз ширење вирус-песимизам и ветување пост-изборни апсења“, пишува Сашо Орданоски во денешната колумна „Алтернатива што ветува реприза?“.
За „обновата на режимот или опстојување на овој Евро пат“, повеќе во денешниот корнер на Зоран Иванов.
Маја Ивановска
во соработка со: Дијана Тахири и Дехран Муратов
