РЕСТРИКТИВНИ МЕРКИ Министерот за здравство Венко Филипче на денешната прес-конференција изјави дека денеска разговарале за евентуално воведување дополнитени рестриктивни мерки, но заедничкиот став бил дека ќе се почекаат податоците од следните два до три дена за потоа да се донесе одлука. Филипче додаде дека МВР треба поинтезивно да работи на контрола на теренот за имплементација на мерките кои се на сила. Дополнителните мерки би биле карантин на одредени општини, во кои има поголем број дијагностицирани пациенти, и воведување полициски час, исто така локализирано.
ГРАНИЦИ Министерот Филипче посочи дека се уште е рано да се отворат границите, наведувајќи дека ја следат ситуацијата и ги анализираат бројките, па понатаму ќе донесат одлука.
„Сметам дека сега е се уште рано да ги отвориме границите заради тоа што тоа е дополнителен ризик и кон околните земји, ако патуваат луѓе од региони во кои има повеќе пацинети кај нас, а и при враќањето секако. Патувајќи се зголемува ризикот од појава на случаи кои, на некој начин, би го донеле вирусот од некој од соседните земји. Во таа смисла ќе ги правиме проверките на податоците, ќе ги анализираме бројките па ќе носиме одлука за границите. Утрово утврдивме дека денеска е рано да се дискутира за тоа, но ја имаме цела недела пред нас“, истакна министерот, одговарајќи на новинарско прашање кога ќе се отворат границите во земјава.
ОДЛУКА Во однос на новозаболените во Штип, министерот истакна дека тие се контакти на оние пациенти кои беа претходно дијагностицирани, вработени во неколку конфекции.
„Екипа од Министерството за здравство и Државниот санитарен и здравствен инспекторат, денеска, престојува во Штип, со цел да направи увид во работата на Центарот за јавно здравје. На локалниот кризен штаб, кој го води градоначалникот беше донесена одлука да се затворат пет конфекции до следниот понеделник, за којшто период близу 600 вработени ќе бидат истестирани, а тие во меѓувреме нема да претставуваат ризик за другите луѓе со кои работат. Исто таква активност во смисла на посета и анализа на работата на Центарот за јавно здравје, екипа од Институтот за јавно здравје и Министерството за здравство денеска е пратена во Куманово“, изјави Филипче.
САМОИЗОЛАЦИЈА Градоначалникот на општина Бутел, Велимир Смилевски, соопшти дека самоиницијативно ќе биде во самоизолација, поради средбата со директорката на УЈП Сања Лукаревска која е позитивна на КОВИД-19. Директорката на УЈП Лукаревска, утрово на својот Фејсбук профил објави дека е позитивна на КОВИД-19.
ИЗБОРИ Вицепремиерот Бујар Османи на емисијата „Click Plus“ на ТВ21, изјави дека избори ќе има или на 5-ти јули или редовен термин на есен и дека ќе се направат напори да се создадат услови за постигнување на концензус, пренесува ТВ21.
СУБВЕНЦИИ Вкупно 696 граѓани поднеле барања за субвенции за купен велосипед и 91 барање за субвенции за купен тротинет, откако вчера Град Скопје ги објави јавните повици.
А. Петровска
