ОГРАНИЧУВАЊА На денешната прес конференција на премиерот Оливер Спасовски во одговор на прашањето на ЦИВИЛ Медиа дали Владата ќе ги изедначи правата на слободно движење за сите, како што препорачува ЦИВИЛ, со оглед на тоа дека ограничувањето на движењето на повозрасните граѓанки и граѓани предизвикува турканици и уште повеќе ги изложува на ризик, рече дека ограничувањата што се донесени се токму во функција за заштита на најстарите, но и најмладите граѓани.
ЦИВИЛ доби одговор: Лицата без здравствено осигурување, ќе се лекуваат бесплатно од КОВИД-19
БЕСПЛАТНО ЛЕКУВАЊЕ Владата на денешната 36 седница донесе Уредба со законска сила за примена на Законот за здравствено осигурување за време на вонредна состојба според која на осигурениците на кои им се ускратени правата од задолжителното здравствено осигурување поради нередовно уплатуван придонес или уплатата на придонесот задоцнила повеќе од 60 дена, односно имаат долг за неплатен придонес, можат во здравствените установи да користат здравствени услуги поврзани со дијагностицирање и лекување од коронавирусот КОВИД-19 на товар на средствата на Фондот за здравствено осигурување на Република Северна Македонија. Оваа Уредба за лекување од КОВИД-19 на товар на Фондот, се однесува и на државјаните на Република Северна Македонија кои не се задолжително здравствено осигурани по ниту еден основ.
НОВИ СМРТНИ СЛУЧАИ „Пред самото вклучување во емисија добив информација од Центарот за јавно здравје дека имаме уште двајца починати наши сограѓани во Куманово“, соопшти градоначалникот на Куманово, Максим Димитриевски вечерва во емисијата „Топ тема“, споделувајќи најнова информација од Центарот за јавно здравје.
КОВИД-19 ТЕСТОВИ „Mасовноста на тестирање за коронавирусот не е прашање на недостиг на ресурси, туку прашање на стратегија која мора да е научно и емпириски заснована и да доаѓа од стручната комисија, а не да се заснова на политички одлуки и под притисок на јавноста“, смета вицепремиерот за европски прашања Бујар Османи, кој е и координатор на штабовите на локалната самоуправа и Градот Скопје.
МИЛЕНИЧИЊА Според одлуката на Владата од денешната, 36-та седница, на целата територија на државата, своите миленичиња од понеделник до петок сопствениците ќе може да ги изнесуваат од домовите 30 минути навечер, од 20 до 20.30 часот. Во сабота и недела дозволено им е да ги изнесат трипати во денот – наутро од 8 до 8.30 часот, попладне од 15 до 15.30 и навечер од 20 до 20.30 часот. Притоа треба да бидат оддалечени најмногу 100 метри од објектот во кој живеат и да го задржат минимум потребното растојание од останатите лица и да не се групираат.
ПОВРАТНИЦИ Во соработка со амбасадата на Република Северна Македонија во Лондон, генералниот секретаријат на Владата, МВР и Министерството за здравство, МНР организираше чартер лет за враќање на затекнатите граѓани во Обединетото Кралство. Од аеродромот Лутон, во близина на Лондон, со лет на Визер репатрирани се 130 македонски граѓани, а на летот кон Скопје, во соработка со британската амбасада во Северна Македонија, беа превезени 60 странски државјани од Обединетото Кралство, САД и Австралија.
КОНВОЈ Денеска се организираше 4-ти по ред хуманитарен конвој, овој пат од Босна и Херцеговина и Црна Гора, со што во земјата ќе се вратат вкупно 64 македонски граѓани со 19 возила.
Б. Јордановска
6 април, вонредна состојба, ден 19: Ригорозни мерки, Владата апелира – сите да бидеме поодговорни…
