ВЕСТ НА ДЕНОТ
Албанија официјално ги почнува преговорите со ЕУ
Пред денешното заседание на Совет за општи работи на ЕУ (ГАК) во Луксембург, ќе се одржи Втората меѓувладина конференција ЕУ-Албанија, со што Тирана практично ќе ги започне преговорите за членство во Унијата по првиот Кластер „Основни вредности“.
ИЗЈАВА НА ДЕНОТ
Рама: „Благодарение“ на Путин и најскептичните согледаа дека Западниот Балкан е потребен на ЕУ
„И покрај различните расположенија и различните нивоа на посветеност или на скептицизам кон проширувањето, ние никогаш не се поколебавме затоа што за нас Европската Унија и Европа се единственото место каде што треба да бидеме и единственото место за живот на нашите идни генерации. Така што, овој момент е посебен… „Благодарение“ на Путин и најскептичните согледаа дека Западниот Балкан е потребен на ЕУ“, изјави албанскиот премиер Еди Рама пред почетокот на Втората меѓувладина конференција ЕУ-Албанија
РЕГИОН
Дијалогот Косово-Србија, Курти: Очекуваме нова динамика од ЕК
Косовскиот премиер Албин Курти изјави дека Косово очекува новата Европска Комисија да започне со нова динамика во однос на дијалогот за нормализација на односите меѓу Косово и Србија. Курти на новинарите им кажа и дека на состаноците што ги одржал во Берлин побарал ЕУ да ги отстрани казнените мерки што и беа наметнати на Косово минатата година поради тензиите на северот, но и да му даде статус на земја кандидат. Косово е единствената земја во регионот на Западен Балкан што нема статус на земја-кандидат, бидејќи земјата аплицираше за членство во ЕУ во декември 2022 година.
СВЕТ
Во 37 држави почна предвременото гласање за претседателските избори во САД, досега гласаа пет милиони луѓе
Во 37 сојузни држави веќе почна предвременото гласање за претседателските избори во САД, а тоа право до синоќа го искористија речиси пет милиони гласачи, кои гласале по пошта или лично.
Четвртата тематска конференција по Самитот за мир беше посветена на точката од Формулата за мир за спречување на ескалација на војната
На Четвртата тематска конференција по Самитот за мир присуствуваа претставници на 66 држави и меѓународни организации. Шефот на кабинетот на Претседателот на Украина, Андриј Јермак, нагласи дека постоечката глобална безбедносна архитектура не успеа да понуди ефективни средства за спречување на руската агресија. Според него, војната во Украина има глобални импликации, загрозувајќи ја нуклеарната, прехранбената, енергетската и безбедноста по животната средина.
ПРАШАЊЕ НА ДЕНОТ: Што треба да содржи писмото на Мицкоски до ЕУ?
РЕАКЦИИ: По сите негативни одрази во земјата, ќе остане само да се аплицира за албански пасоши
Според пораките и коментарите што пристигнаа како одговор на ова ПРАШАЊЕ НА ДЕНОТ, нашите читатели, меѓу другото, сметаат дека дека или нема многу да влијае, но и дека – како во случајот со Бугарија – ќе предизвика вадење на албански пасоши.
КОНТЕКСТ
Авторот Боб Вудворд во својата најнова книга промовирана денеска, открива дека кога Трамп беше претседател во 2020 година, тајно му испратил уреди за Ковид-тестови на Путин во време кога целиот свет се соочуваше со осакатувачки недостиг од сè што беше поврзано со пандемијата. Книгата открива дека Путин бил смртно преплашен од болеста и со олеснување го примил подарокот од Трамп. Притоа, пишува Вудворд, Путин го предупредил да не кажува никому за подарокот, не поради него, туку поради можните политички последици по Трамп, кој на тоа реагирал со зборовите “не ми е гајле“. Повеќе за книгата, во текстот „Тајната комуникација на Трамп со Путин и други поенти од новата книга на легендарниот Боб Вудворд“ од Џабир Дерала.
Подготви: Б. Јордановска
