Шефот на кабинетот на Претседателот на Украина, Андриј Јермак, учествуваше на тематска онлајн конференција посветена на точка 9 од Формулата за мир „Спречување на ескалација на војната и повторување на агресијата“.
Оваа конференција беше четврта по ред, а резултатите од секој ваков настан ќе се користат за формулирање на предлози за вториот Самит за мир.
На состанокот присуствуваа претставници на 66 држави и меѓународни организации. Украинската страна беше претставена и од заменик шефот на кабинетот на претседателот, Ихор Жовква, заменик министерот за надворешни работи, Јевхен Перебијнис, заменик министерот за одбрана за евроинтеграции Серхиј Бојев и советниците на шефот на кабинетот на претседателот Дарила Заривна и Олександр Бевз.
Андриј Јермак нагласи дека постоечката глобална безбедносна архитектура не успеа да понуди ефективни средства за спречување на руската агресија. Според него, војната во Украина има глобални импликации, загрозувајќи ја нуклеарната, прехранбената, енергетската и безбедноста по животната средина.
„Потребна ни е обновена безбедносна архитектура заснована на меѓународното право и поддржана од сопствените одбранебени способности на Украина. Овој систем треба да ја опфаќа не само воената компонента, туки и санкциите, финансиската помош, инвестициите и широката соработка во различни области“, рече шефот на претседателскиот кабинет.
Тој, исто така, истакна дека Украина работи со своите партнери на ажурирање на безбедносната архитектура, што треба да помогне да се одврати и запре аресијата низ светот.
Ихор Жовква, заменик шеф на кабинетот на претседателот, забележа дека 32 држави веќе се приклучија на Заедничката декларација на Г7 за поддршка на Украина од 2023 година.
„Вкупно, како резултат на потпишувањето на 26 билатерални безбедносни договори, имаме околу 40 милијарди декларирана воена помош за Украина само во 2024 година“, додаде тој.
Тимоти Бароу, советник за национална безбедност на премиерот на Обединетото Кралство, нагласи дека партнерските земји треба да ја поддржат Украина на нејзиниот пат кон праведен мир и да развијат механизам за спречување на идна агресија. Обединетото Кралство е ко-водач на точка 9 од Формулата за мир и беше првата земја што потпиша билатреален договор за безбедносна соработка со Украина врз основа на Заедничката декларација на Г7.
Конференцијата резултираше во Заедничко комунике, чиј текст е достапен подолу. Комуникето ја одразува визијата на државите за спречување на ескалација и повторување на агресијата како систем на мерки што вклучува билатерални и мултилатерални безбедносни заложби и договори, зајакнување на одбранбените способности на Украина, ефикасно спроведување на политиката на одвраќање на идна агресија, особено со враќање на територијалниот интегритет на Украина, компензација за штетите, политика на санкции и механизам за одговор на ризикот од нова агресија. Понатаму, учесните истакнаа дека Украина тргна на неповратен пат кон целосна евроатлантска интеграција во рамките на нејзиното суверено право.
Превод: Н. Цветковска
