ТЕМА НА ДЕНОТ
Еден месец по трагедијата во Кочани, под истрага за одговорност досега се над 60 осомничени
Еден месец по трагичниот пожар во импровизираниот ноќен клуб „Пулс“ во Кочани, македонската јавност сè уште е во шок, додека институциите се соочуваат со комплексна и обемна истрага за утврдување на одговорноста. До денес, животот го загубија 61 лице, а околу 200 беа повредени, меѓу кои 25 се малолетници.
Триесет и еден ден подоцна, јавноста сè уште чека одговори, а институциите се соочуваат со обемна истрага. Освен градоначалникот на Кочани, ниту еден актуелен министер, ниту државен функционер не поднесе оставка од морални причини.
Досегашната истрага која ја води Основното јавно обвинителство Кочани со поддршка на Обвинителството за гонење на организиран криминал и корупција опфати над 60 физички и три правни лица. Меѓу нив се сопственикот на „Пулс“ Дејан Јованов, тројца градоначалници на Општина Кочани, поранешни министри за економија, инспектори, полициски службеници и други лица поврзани со добивањето и продолжувањето на дозволите за работа на импровизираната дискотека.
Меѓу приведените е и Љупчо Папазов, кој во моментот на несреќата ја извршуваше градоначалничката функција, а ден подоцна си поднесе оставка.
Од синоќа, под истрага се уште десетмина полицајци од Кочани и од Штип. Се сомничат дека од 2012 до 2022 година издавале согласности и му овозможувале на „Пулс“ да стекне лиценца за вршење угостителска дејност, иако фирмата не ги исполнувала предвидените услови. МВР соопшти дека шестмина од полицајците се приведени, по еден се трага, а тројца од претходно издржуваат мерка притвор.
-Во конкретниот случај постои основано сомнение дека осомничените во временскиот период од 07 декември 2012 година до 21 јануари 2022 година, како соизвршители, сториле кривично дело „Тешки дела против општата сигурност“, велат од Републичкото јавно обвинителство.
ИЗЈАВА НА ДЕНОТ
Кос: Никој не може да гарантира дека по уставните измени не би имало пречки на европскиот пат на Северна Македонија
„Разбираме дека ова не е лесно прашање. Промена на Устав. Сфаќаме и тоа е многу човечки и разбирливо што вашата земја сака да има гаранции по се она што го помина. Гаранции не може да има, но она што го очекувам од сите земји членки кога има билатерални прашања, е разговорите да се водат со добра волја и со визија да се дојде до компромис, изјави еврокомесарката за проширување Марта Кос во интервју за Европската новинска редакција (ЕНР)
РЕГИОН
Под притисок на проруската партија БСП, Бугарија неочекувано ја отфрли продажбата на руски нуклеарни реактори на Украина
Бугарија неочекувано одлучи да не ги продаде своите два неискористени руски нуклеарни реактори на Украина, пресврт во последен момент предизвикан од притисокот на проруската Бугарска социјалистичка партија (БСП).
„Од самиот почеток бевме категорични дека овие реактори не се на продажба. Тие се клучна предност за Бугарија – дел од нашата енергетска безбедност и економска независност“, рече водачот на БСП, Атанас Зафиров, кој ја извршува и функцијата вицепремиер.
СВЕТ
ПРОПАГАНДАТА НА КРЕМЉ ПОВТОРНО НАПАЃА: Лажните тврдења за бунт шират дезинформации во обид да го дестабилизира моралот на фронтот и водството во Украина
Рускиот медиум контролиран од државата РИА Новости – заедно со неколку други пропагандни веб-страници поврзани со Кремљ, како што се Pravda и TopWar, и каналите на социјалните мрежи – повторно објави бесрамна дезинформација — овој пат лажно тврдејќи дека украинските падобранци од 95-та одделна воздушно-дестана јуришна бригада планираат да го соборат претседателот Володомир Зеленски и да „маршираат кон Кијив“.
Извештајот, кој беше објавен денес, наведува дека „ветерани и офицери“ од елитната бригада изразиле подготвеност да „дејствуваат против Зеленски“ и ги повикале и воениот персонал и цивилите да им се придружат на наводниот државен удар. Наводниот извор на оваа информација е анонимна личност од, она што РИА Новости нејасно го опишува како „антифашистичко подземје“.
ПРАШАЊЕ НА ДЕНОТ: Што мислите за работата на Антикорупциската комисија?
Антикорупциска често објавува информации за водење истраги за корупција и непотизам. Повеќето случаи остануваат само на соопштенија, а самите случаи се мали и не предизвикуваат промени. Забележливо е дека врвот на власта никогаш не е предмет на истрагите на Антикорупциска.
АЛ-ПРЕС
Редакциски избор на ЦивилМедиа од албански медиуми во регионот: Бугарија ја демантира изјавата на косовскиот министер за одбрана дека ќе се приклучи кон одбранбениот сојуз со Хрватска и Албанија; 26 години од егзодусот на 1 милион Албанци принудени да го напуштат Косово од српските паравоени сили.
Подготви: Д. Тахири
