ВЕСТ НА ДЕНОТ
Пендаровски се откажа од доживотната пензија, првиот политичар што ја поддржа иницијативата на ЦИВИЛ за укинување на привилегиите на функционерите
Поранешниот претседател на Република Северна Македонија, Стево Пендаровски, ќе се откаже од дел од привилегиите кои му следуваат согласно законот, односно, нема да ја користи доживотната пензија, но ќе користи канцеларија со тројца вработени од неговиот поранешен кабинет, соопштија од неговиот кабинет, за ЦИВИЛ Медиа.
Со оваа одлука, Пендаровски е првиот претседател на државата кој се откажал, односно нема да ги користи привилегиите по завршување на мандатот, како што тоа го прават сите негови претходници.
Во согласност со безбедносните проценки, од МВР ќе продолжат да го обезбедуваат поранешниот претседател.
На 14 мај 2019 година, ЦИВИЛ ја започна Иницијативата за укинување на привилегиите на функционерите. Иницијативата #КрајЗаРасипништвото ја поддржаа шест илјади граѓанки и граѓани во онлајн петицијата што ја започна организацијата.
ИЗЈАВА НА ДЕНОТ
Пол Мекарти, директор за Европа во ИРИ, коментирајќи ја анкетата оценува дека постои силна желба низ Балканот за зајакнување на врските со западните економии и за приклучување кон ЕУ.
„Оваа широка поддршка покажува дека луѓето од целиот регион веруваат дека понатамошната интеграција во Европската унија може да помогне за постигнување одржлив просперитет“, вели Мекарти.
ФЛЕШ ВЕСТИ
ДИК/ИЗБОРИ По Желино ќе се прегласува и на избирачки места во Охрид и Крушево – „Европски фронт“ со обвинувања за изборен инженеринг
ПРЕГОВОРИ ВМРО-ДПМНЕ и Коалицијата „ВЛЕН” ги формираа работните групи за продолжување на разговорите за евентуално коалицирање во идната влада, откако викендот ги договорија општите начела за соработка.
РЕАКЦИИ Европската унија и САД испраќаат гласна порака до Северна Македонија, која е додадена на јасните предупредувања на Грција и веројатно ќе се слушне погласно од „македонската кауза“ што новата претседателка на земјата, Гордана Силиановска, ја избра да ја игра, влечејќи ја земјата во „танцот на Залонгос“, пишува грчка Прототема.
ЕПП со остри реакции по говорот на претседателката, ВМРО-ДПМНЕ на врвот на листата за „генерално чистење“ од членството
ОСУДА Директна осуда на изјавите на претседателката Сиљановска Давкова дојде и од сестринската партија на ВМРО-ДПМНЕ во Германија, опозициската ЦДУ. Пратеникот на демохристијаните и надворешно-политички говорник, Јирген Харт вели дека Брисел мора да им испрати јасна порака на Сиљановска и на ВМРО-ДПМНЕ дека таквата политика нема да се толерира.
ПРЕСПАНСКИ ДОГОВОР Ципрас и Заев разговарале за политичкиот случувања кај нас, а освен важноста на Договорот од Преспа, според информациите на МИА од Атина, посочиле и „колку е лицемерен и опасен националистичкиот популизам што се разви и на двете страни“.
ВОЈНА ВО УКРАИНА
Американскиот државен секретар Антони Блинкен во вторникот пристигна во Кијив во првата посета на Украина од страна на висок американски функционер откако Конгресот го усвои долго одложуваниот пакет воена помош од 61 милијарда долари за земјата минатиот месец.
КОНФЛИКТИ
Терористичката група Хамас со помош на тајната полиција во Појасот Газа со години ги шпионира палестинските цивили со цел да го уништи секое противење на тврдокорното владеење на групата над територијата.
Лидерот на Хамас, Јехиа Синвар, со години ги надгледувал тајните полициски сили во Појасот Газа, кои вршат надзор над секојдневните Палестинци и градат досиеја за млади луѓе, новинари и оние кои ја критикуваат владата на Хамас, според разузнавачките претставници и низата внатрешни документи во кои имаше увид Њујорк Тајмс.
СЛОБОДНА ЗОНА
„На 14 мај, Украина го почитува споменот на Украинците кои ги спасуваа Евреите за време на Холокаустот во времето на Втората светска војна.
Спасители на Евреите биле Полјаците, Холанѓаните, Французите, Украинците, како и Кримските Татари, Ерменците, Грците, Германците, претставници на различни религиозни деноминации. Овие луѓе покажаа хуманост и покрај тоа што за давање помош на Евреите, смртната казна им се закануваше не само на самите спасители, туку и на нивните деца, членови на нивните семејства“, пишува Амбасадорка на Украина во Република Северна Македонија Лариса Дир во колумната „Праведници на Украина“.
*
„Се прашувам како е кај мајките со деца со предизвици и нетипичности и се молам за сите нас, да сме добро.
Штом се погледнам во очи со друга мајка на 3, посебно ако 2 од нив се година дена разлика, посебно ако сама си ги исчувува, ми течат солзи и викам „среќа што се вака немирни, здрави прави деца, тоа им е работа“ и длабоко верувам во ова.
Понеделник е за градинка кој да знае за кое добро беа овие 2 и пол месеци, едвај чекам да видам, покрај сè, плачам дека ќе тргаат и колку ќе ми фалат.
Колку е лесно човек да ве сака, дивјачиња мои МНС.
Кој рече дека мајчинството е лесно а љубовта не е брутална?
Happy Mothers day to all of us“, пишува Дороти Пачкова во колумната „Љубовта не е брутална?“.
Д. Муратов
