ВЕСТ НА ДЕНОТ
Трамп му воведе царински тарифи на целиот свет, освен на Русија и Белорусија
Американскиот претседател Доналд Трамп наметнува универзална царина од 10% на целиот увоз во САД, со уште повисоки стапки за, како што ги нарекува, „најлошите престапници“, во пресуден момент за глобалната трговија.
Во својот последен потег, Доналд Трамп воведе нови царини за многу земји, вклучително и за сојузниците, меѓу кои и Северна Македонија за која одреди тарифа од 33% (скоро колку за Кина) и за Украина – но не и Русија и Белорусија.
ЕУ го опишува како „голем удар за светската економија“, Италија го нарекува „погрешно“, а Австралија вели „ова не е чин на пријател“ . Кина – една од најтешко погодените од овој потег – вети одмазда.
Тарифата од 10 отсто за Обединетото Кралство е дочекана со олеснување, но не и со задоволство меѓу министрите, објави политички уредник на Би-би-си, Крис Мејсон.
Меѓу блиските сојузници на САД, Европската унија беше цел со стапка од 20 отсто, Јапонија со 24 отсто, Јужна Кореја со 25 отсто и Тајван со 32 отсто. Дури и некои мали територии и ненаселени острови на Антарктикот беа погодени од царини, според списокот објавен од Белата куќа.
Од Владата на Република Северна Македонија уверуваат дека одлуката на САД за царинските трошоци, нема да има голем импакт врз нашата економија, но имаме подготвен план за надминување на ситуацијата.
ИЗЈАВА НА ДЕНОТ
Митовски: Водата во Крива Паланка е толку загадена што не смее да се употребува ниту за наводнување
„Концентрацијата на штетните супстанции коишто ги надминуваат акутните нивоа на токсична за водениот свет-вода во оваа класификација односно петта класа не смее да се користи за ништо ниту пак за наводнување.
Хемиските показатели на суспендираните материи коишто се присутни во водата којшто ја намалуваат пропустливоста на светлината во природната вода и влијаат животната средина, го уништуваат живиот свет се главни причинители за поморот се со вредност замислете дури 7.876 микрограми на литар од максимум дозволените 30 микрограми на литар којшто сепак за повеќе од 120 пати зголемени.“ рече на денешната прес-конференција градоначалникот на општина Крива Паланка, Сашко Митовски.
Суспендираните материи од органско и неорганско потекло, тешко се раствораат во водата и според Митовски се главен показател и за присуството на тешките метали во Крива река. Тој дополнува дека резултатите од сегашната и претходната анализа на општината, покажуваат дека водата во Крива река е неупотреблива и сериозно загадена.
РЕГИОН
Судот на Босна и Херцеговина потврди дека црвената потерница за Додик и Стевандиќ не стапила во сила
Судот на Босна и Херцеговина денеска потврди дека меѓународната црвена потерница за претседателот на Република Српска Милорад Додик и претседателот на Собранието на Босна и Херцеговина, не стапил во сила.
СВЕТ
Унгарија ќе се повлече од Меѓународниот кривичен суд откако Нетанјаху ја посети Будимпешта
Унгарија одлучи дека земјата ќе се повлече од Меѓународниот кривичен суд (МКС), соопшти владата во четвртокот, набргу откако израелскиот премиер Бенјамин Нетанјаху пристигна во земјата во државна посета.
ЦИВИЛ
Одбрана на демократијата и човековите права: Нова публикација на ЦИВИЛ за глобалната публика
ЦИВИЛ – Центар за слобода, во партнерство со Медиа Дијалог (Media Dialogue) и Младите за медиумите (Youth4Media) од Германија, и меѓународната организација Нов европски граѓански форум со седиште во Брисел, најавува промоција на публикацијата „Одбрана на демократијата и човековите права – извештај и препораки“.
Публикацијата е на англиски јазик и опфаќа обемен документ за политики, со препораки и стратешки насоки за борба против дезинформациите и хибридните закани, јакнење на демократските институции, граѓанското општество и медиумите, и решително сопирање на авторитаризмот, воените агресии и ултра-десничарските тенденции.
ПРАШАЊЕ НА ДЕНОТ: Дали е потребна лидерска средба и што ќе донесе?
Премиерот Христијан Мицкоски и лидерот на опозициската СДСМ Венко Филипче денеска ќе имаат средба во Владата, но претходно тие „ќе се соочат“ и во пленарната сала во Собранието каде премиерот и министрите ќе одговараат на опозициски прашања.
СЛОБОДНА ЗОНА
„Руската „мобилизација“ на окупираните територии претставува брутално кршење на меѓународното право, особено на Женевската конвенција за заштита на цивилното население за време на војна, според која на државата-окупатор ѝ е забрането да ги присилува лицата да служат во нејзините вооружени или помошни сили, како и да врши притисок и пропаганда во корист на доброволно приклучување кон армијата.“, од Н.Е. Амб. Лариса Дир во колумната „Руската Федерација продолжува со кршење на Женевските конвенции: Присилна руска мобилизација на украински државјани на привремено окупираните територии на Украина“.
„И сеа шу праиме. Додека сите светски премиери, претседатели, министри излегоа со осуда и најавија контрамерки, нашиов молчи. Ниту тој, ниту претседателката, ниту Министерството за економија гукнаа нешто околу тарифите, какви импликации ќе имаат врз економијата во земјава, ќе се воведат ли контрамерки?
Во меѓувреме, владините служби некако собраа сили пред крај на работното време да испратат едно штуро соопштение, склепано наврат – нанос, да не сме се секирале, немало да имаме последици од тарифите. Мхм, да, секако.“,прочитајте во Брза пошта од Драган Мишев, „СУРТУК ПОЛИТИКА: За ова ли окапа Мицкоски во Вашингтон?“
Подготви: Д. Тахири
