ВЕСТ НА ДЕНОТ
Завршува мерката за ограничување на маржите, ќе има ли нови ценовни шокови за граѓаните?
Истекува мерката за ограничување на цените и маржите што ја воведе Владата пред рамазанските и велигденските празници. Од Министерството за економија и труд велат дека прво ќе ги согледаат конечните резултати што ги даде мерката, а потоа ќе одлучат што ќе прават понатаму. Доколку има злоупотреби најавуваат нови поригорозни мерки.
ИЗЈАВА НА ДЕНОТ
Харун Церо: Изјавите на Додик се опасни шовинистички провокации вкоренети во етнички супремацизам и историски ревизионизам
„Неодамнешната изјава на Милорад Додик, во која се сугерира дека Бошњаците „да се вратат на својата стара православна вера“, претставува гротескно искривување на историјата, напад врз верската слобода и директна закана за уставниот поредок и мултиетничкиот карактер на Босна и Херцеговина. Овие изјави не се „конструктивни предлози“ – тие се опасни, шовинистички провокации вкоренети во етнички супремацизам и историски ревизионизам. Да се сугерира еден цел народ да ја напушти својата религија за да задоволи националистичка визија за држава „со мнозинство српско население“ не е само длабоко навредливо, туку ја одразува и самата логика на културното бришење и присилната асимилација што доведоа до злосторствата во 1990-тите“, изјави политичкиот аналитичар од Сараево, Харун Церо, за ЦивилМедиа.
РЕГИОН
Геноцидната реторика на Додик ескалира: Бошњаците да и се вратат на православната вера за да може БиХ да има мнозинство Срби
Претседателот на ентитетот Република Српска, Милорад Додик, во обраќање до јавноста по состанокот на владејачката коалиција во РС, во досега најсилната геноцидна реторика од негова страна, изнесе низа навредливи, шовинистички и историски неосновани тврдења што предизвикаа бројни реакции во регионалната јавност. Најскандалозниот и навредлив дел од неговиот говор се однесуваше на директен повик до Бошњаците е „ да и се вратат на православната вера“, со тврдење дека во тој случај Босна и Херцеговина ќе биде „ со српско мнозинство“ и дека „само како таква може да постои“.
СВЕТ
Индија и Пакистан на работ на војна, критични следните 24 до 36 часа
Пакистанскиот министер за информации вели дека земјата има „кредибилни разузнавачки информации“ дека Индија има намера да започне воен напад во следните 24 до 36 часа. Војниците од двете страни разменија повремени оган од лесно оружје преку границата во последните денови. Постоеја шпекулации дали Индија ќе одговори со воени напади врз Пакистан, како што направи по смртоносните милитантни напади во 2019 и 2016 година.
ПРАШАЊЕ НА ДЕНОТ: Работнички права
СЛОБОДНА ЗОНА
„Со време – откако ми стана јасно дека по падот на режимот што го насади грамадниот кич Скопје 2014, никој нема да направи нешто да го поправи градот и да ги казни убијците на естетиката – развив одбранбен механизам: не ги забележував. Иако доминираат во централниот дел од градот во кој поминав најголем дел од животот, зданијата и спомениците на тој чудовишен проект – симбол на длабоко искомплексирана, а истовремено и грабежлива и насилничка власт – јас едноставно не ги гледав. Со години. Но реалноста, нели, е посилна. Тоа сончево попладне се втурна во мојот видокруг и – одново – ме порази со својата грдотија и бесмисленост“, пишува Џабир Дерала во „Град окован во лаги и срам: Туристички водич низ отворениот музеј на кичот“
„И сега му ја запалиле куќата, односно викендичката, некористена некој период, стоела така, за секој случај, да се најде.. Има се, може се. И тука морам да се сложам со изјавата на Пандов дека „ова е цената за удирањето по мафијата! Домот ми беше запален, и имам основано сомневање дека станува збор за смислен атак на криминалците!“ Е да, точно е, си знаеш ти, една од главние одлики на криминалците и мафијашите се меѓусебните пресметки. Кој да биде поблиску до капото, кој да заземе повисока позиција, кој да запосли повеќе роднини, сватови, пријатели…“, пишува Драган Мишев во „Пандов љубител на костимирани настапи: ангелче, комита, моторџија, историчар, директор, а сега влезе и во мафијашки филм“.
Подготви: Б. Јордановска
