ВЕСТ НА ДЕНОТ: Говорот на омразата е оркестриран, еден од заклучоците на панел дискусијата на ЦИВИЛ за говорот на омразата
За состојбите, но и за решенијата на проблемите поврзани со деструктивниот потенцијал што го носи говорот на омразата, на панел дискусијата на ЦИВИЛ „Говор на омраза: Состојби и решенија“ денеска говореа Снежана Трпевска, Институт РЕСИС, експертка за медиуми и медиумско право, Петрит Сарачини, активист, новинар и експерт за медиуми, и Кочо Андоновски, програмски директор на ЛГБТИ Центар за поддршка. Модератор на панел дискусијата беше Џабир Дерала, претседател на ЦИВИЛ.
Снежана Трпевска од Институтот РЕСИС, експертка за медиуми и медиумско право, на панелот на ЦИВИЛ „Говорот на омразата: состојби и решенија“ зборуваше за причините за појавите на говорот на омразата во медиумите и надвор од нив.
„Зошто сега се соочуваме се уште со тоа со што се соочуваме, иако веќе три децении зборуваме за тоа дека медиумите треба да промовираат толеранција, а не говор на омраза,тоа е она што е битно за да ги откриеме корените на говорот на омразата“, смета Трпевска.
„Она што е проблем е дека говорот на омразата го посматраме повеќе изолирано од неговите општествени корени. За да дојде до говор на омраза значи дека има многу предрасуди. Во сферата на образованието не се адресираат овие прашања. Има обиди за предмети за медиумска писменост но тоа не е интегрирано во целиот образовен систем. Ние имаме проблем со ерозијата на општествените вредности интегрално. Имаме проблем со насилство во училиштата, од каде доаѓа тоа насилство Состојбите на социјалните мрежи се рефлексија на проблемите во нашето општество. Ние имаме систем и институции, но недостасува соработка меѓу институциите“, заклучува Трпевска.
Кочо Андоновски, програмски директор на ЛГБТИ Центар за поддршка, рече дека говорот на омраза не е ништо друго освен креирање и одржување на атмосфера на страв. Страв кон различни групи, кои во одредени контексти ним (на политичките партии) им требаат за целото незадоволство од себе да го пренасочат кон други.
ПОЛИТИЧКИ ОК КОРАЛ: Oбразовна политичка кампања
Политичките партии почнаа со предизборните ветувања, односно со претставување на своите политички програми. Ветуваат правда, зголемување на платите и пензиите, укинување на патни трошоци и – изградба на патишта.
БЛИЦ: Што (може да) значи средбата Касами – Рикер?
Џабир Дерала: По овие срдечни средби на толку високо ниво, некои „зли“ јазици ова го прокоментираа како конечно губење на „американското тло“ под нозете на Али Ахмети.
ИЗЈАВА НА ДЕНОТ: Прес на ЦИВИЛ: Говорот на омразата едно од главните оружја на предизборната кампања
ЦИВИЛ денеска на прес конференција ги изнесе досегашните наоди од долгорочниот мониторинг на предвремените парламентарни избори. Се работи за комплесен мониториг, со најнови методологии кои се компатибилни на набљудувањето на домашните и странските мисии.
Закани и притисоци, говор на омраза, лажни вести, дезинформации, злоупотреба на службената положба и јавните ресурси и проблеми со Избирачкиот список, бележи ЦИВИЛ во долгорочниот мониторинг на предвремените парламентарни избори.
НЕ ПОМАЛКУ ВАЖНО
Шест членови на политичката партија ВМРО-ДПМНЕ, денеска сведочеа во Кривичниот суд за предметот „Титаник“ кој се води за изборни нерегуларности и незаконско финансирање на предизборна кампања. Сите шестмина прашани од обвинителката Лиле Стефановска изјавија дека не знаеле дека во нивно име е уплатена сума од 60.000 денари на партијата ВМРО-ДПМНЕ како донација и дека за тоа дознале на изјавата во СЈО кога им биле посочени уплатници.
*
Премиерот Оливер Спасовски се сретна со делегација на Националниот совет на Република Австрија, предводена од претседателот на Советот, Волфганг Соботка. На средбата, како што информира владината прес-служба, е соопштено дека продолжува јасната поддршка од Република Австрија за европерспективите на нашата држава и за отворањето на преговорите со ЕУ.
-Изразени се честитки за патот што го изоде Република Северна Македонија во реформскиот процес и во добрососедските односи. Констатирано е дека Договорот од Преспа е пример за решавањето чувствителни билатерални прашања и во целиот регион. Посебно е посочен како важен чекор за напредокот, донесениот Закон за јавно обвинителство, се вели во соопштението од Владата.
*
Негативни се тестовите за корона вирус на двајцата странци, едниот државјанин на Сингапур, другиот на Австралија, кои од 28 февруари престојуваат во Скопје, соопшти Министерството за здравство.
По пријава на хотелот во кој престојувале, епидемиолозите од Центарот за јавно здравје – Скопје од пациентите земаа брисеви за тестирање во нивната хотелска соба, каде тие останаа до добивањето на резултатите. Попладнево ќе бидат упатени на Клиниката за инфективни болести и фебрилни состојби за третман соодветен на дијагнозата.
*
Во наредниот период ќе има нови електронски услуги за граѓаните од институциите преку Националниот портал, за издавање лични документи од Министерството за внатрешни работи, документи од Управата за водење матичните книги (УВМК), упис на деца во градинка и училиште. Следен чекор ќе биде автоматска размена на податоци меѓу институции. Поради сите овие процеси некаде ќе има вишок вработени во администрацијата, а некаде не, вели ресорниот министер Дамјан Манчевски.
ЦИВИЛНИ АКТИВНОСТИ
Проектот „Европа е наш дом“, во чии рамки се одржува панел дискусијата, е поддржан од Министерството за надворешни работи на Сојузна Република Германија.
Во тек е повикот за краткорочни набљудувачи на ЦИВИЛ
Поради зголемување на обемот на изборниот мониторинг, ЦИВИЛ ги повикува своите членови, поддржувачи и учесниците на семинарите за граѓанско новинарство, набљудувачите на претходните изборни процеси, како и сите заинтересирани полнолетни граѓанки и граѓани да аплицираат за краткорочни изборни набљудувачи.
Предност во процесот на избор за набљудувачи, како и секогаш, имаат членовите и поддржувачите на ЦИВИЛ, поранешни набљудувачи, како и оние што учествувале на семинарите за граѓанско новинарство.
Од тимовите за мониторинг на овие избори, на најуспешните двајца ќе им биде понуден ангажман во сферата на мониторингот и промоцијата на проектот „Европа е наш дом“ до крајот на јануари 2021 година.
Набљудувачите на ЦИВИЛ, како и сите заинтересирани граѓанки и граѓани, секогаш имаат можност да станат дел од проектите на ЦИВИЛ, особено проектот „Граѓански објектив“.
Мониторингот на ЦИВИЛ подразбира мобилност, посветеност и непристрасност. Краткорочните набљудувачи се активни во текот на изборниот молк, на денот на гласањето и еден ден по гласањето.
Функционери и активисти на политички партии немаат право на учество на овој повик. Не е дозволено да се биде набљудувач на две организации истовремено.
СЛОБОДНА ЗОНА
Сашо Орданоски во својата колумна „Јавниот интерес и рекетарската фабрикација“, пишува: Опозицијата (и нејзиниот истакнат финансиер, кој наводно бил рекетиран, а е самиот обвинет за тешки кривични дела во друга постапка) вложи многу изборни надежи во аферата „Рекет“. Тие политикантски инвестиции сè уште траат (се палат и билборди на таа тема деновиве!), иако амбициозната суштина на самиот скандал, наспроти нивните намери, им се „стопија“ како коцка мраз на пролетно сонце.
