Услов за квалитетно образование на учениците од помалите етнички заедници и ранливите групи е еднаквата шанса што ќе им овозможи целосно да ги остварат своите потенцијали.
Околу 160 наставници се вклучени во обуките од проектот „Speech4Teach“, што ги организираат Фондацијата Отворено општество – Македонија и Фондацијата за образовни и културни иницијативи „Чекор по чекор“, а годинава тие беа посветени на социјалната правда и создавањето услови за рамноправност, надминување на предрасудите и елеминирање на нееднаквоста.
Сузана Киранџиска, извршен директор на Фондацијата „Чекор по чекор“, соопшти дека биле опфатени десет основни училишта од исто толку општини, главно во рурални средини, каде што има образование за помалите етнички заедници и настава на турски, босански, ромски и на српски јазик.
-Тоа се децата кои живеат во рурални средини, кои зборуваат на јазик што не е толку опфатен во средините. При посетите на училиштата забележавме дека иако тие деца имаат можност да учат на својот мајчин јазик, сепак во некои случаи им недостигаат учебници и воннаставна литература на нивните јазици или немаат наставен кадар, изјави Киранџиска.
Од обуките што ги организираат во училиштата се формираат заедници за учење каде што наставниците имаат можност да детектираат нешто на што сакаат да работат или да унапредат во текот на годината, а со тоа и да ја подобрат својата педагошка пракса.
Како и во претходните три години на настаните од проектот „Speech4Teach“, и овојпат во делот инспиративни говори, неколкумина учесници, главно наставници, зборуваа за своите лични и професионални искуства на тема социјална правда.
Прим. д-р Мери Бошковска, психијатар за деца со долгогодишно искуство во областа на менталното здравје на децата, рече дека различните деца често наидуваат на неприфаќање и недоразбирање кое се манифестира низ стереотипи, предрасуди и дискриминација и праша дали навистина во образованието им се даваат исти можности на сите деца и дали се бара исто од сите деца.
-Оваа општествена неправда, свесно или несвесно, се вовлекува во училниците, било да е тоа од односот на наставникот, или од однесувањето на другите деца или, пак, нивните семејства, па дури и пошироко во општеството. Ова не се фрази, туку го гледам во мојата пракса. Овие деца се чувствуваат лошо и во иднина може да манифестираат одредени емоционални проблеми – намалена самодоверба, несигурност, отпори кон училиштето и учењето, поради што детето нема да може да ги користи и развие своите потенцијали и во иднина да стане рамноправен член во заедницата, рече Бошковска.
Со видеопорака се обрати Марк Гинзберг, декан на Колеџот за образование на Универзитетот „Џорџ Мејсон“ во Вирџинија, САД, кој истакна дека социјалната правда и толеранцијата на различностите е моќна алатка во училниците што го подобрува образованието. Рече дека е предизвик да се разберат различните култури, постојано да се унапредуваат и заштитуваат човековите права, пред сè социјалните и економските на ранливите групи, и да се создадат услови каде што еднаква можност да учат ќе имаат сите ученици, без оглед на нивната припадност, јазикот, попреченоста или способноста.
-Социјална правда во образованието е кога ќе се елиминира нееднаквоста зашто сите ученици еден ден треба да станат одговорни граѓани во општеството, порача Гинзберг.
Извор: МИА
