„Оставам одлуките да ги носат органите во партијата“, рече министерот Оливер Спасовски, одговарајќи на новинарско прашање дали тој е најсериозниот кандидат да биде премиер на техничката влада.
„Јас сум подготвен да се борам за уште еден мандат на оваа Влада. Дали ќе бидам на одредена позиција или ќе бидам само потпретседател на СДСМ, таа работа никој не може да ми ја земе, за да направиме се СДСМ да биде идниот мандатар повторно“, вели Спасовски.
За него, и премиерот Заев рече дека е едно од најсоодветните решенија, меѓутоа конечниот избор ќе биде соопштен во петок.
„Но, јас сакам органите и телата кои се надлежни да ја донесе соодветната одлука. Решенијата во делот на дискусијата ќе бидат многу прагматични, секако и во амбиентот на коалицијата треба тие да бидат формализирани и подоцна ќе бидат соопштени “, изјави Заев.
За два дена треба да бидат соопштени и дополнителните заменици во МВР, труд и социјална политика и потпретседател за економски прашања. Заев рече дека изборите се договорени и треба да се одржат на 12 април и дека тој е првиот што сака да бидат запазени сите процедури.
П. К.
