Инфлацијата е заедничка мака и во Северна Македонија и во Србија. Секојдневието на граѓаните се сведува на пресметување дали ќе има за храна, сметки или кирија. Но, како што пишува Авторот Љубомир Костовски во анализата специјално за ЦИВИЛ – „Инфлација за сите – профит за малкумина“, токму кризата станува можност за богатење на мал број бизнисмени блиски до власта.
Владата на Христијан Мицкоски ја презема српската формула на Александар Вучиќ: ограничување на маржите наместо вистинско замрзнување на цените. Но, ако Вучиќ со пропагандна машинерија умее да го прикаже овој потег како успех, владата на Северна Македонија го прави уште понеуспешно. Цените растат, инфлацијата го јаде стандардот, а владата се појавува како гласноговорник на стопанските комори и интересите на крупниот капитал.
Примерот со Стопанската комора и нејзиниот лидер Азески е јасен: со едно писмо до премиерот се блокираат мерки кои би биле во корист на потрошувачите. Тоа е доказ дека политиката не се води за да ги заштити граѓаните, туку за да ги зачува профитите на малкумина.
Слична е и српската слика – олигарсите блиски до Вучиќ контролираат клучни економски сектори, од трговија до оружје, додека обичните работници преживуваат со минимални плати. Во Северна Македонија, Азески се појавува како клучен играч и во минатата, и во сегашната влада, додека останатите имиња од бизнисот – Анѓушев, Ангеловска, Камчев – се „играчи“ кои во различни моменти ја искористиле кризата за лична добивка.
Заклучокот е непријатен: владата на Северна Македонија не само што ја следи српската економска логика, туку тоа го прави и на уште понеспособен начин. Инфлацијата ја чувствуваат сите, профитот го собираат малкумина, а политичката елита останува заробена од олигархиски интереси.
Доколку овој тренд продолжи, Северна Македонија ризикува да западне во уште поголема социјална криза. Кога државата свесно се откажува од заштита на граѓаните и се става во служба на бизнис-елитите, резултатот е неизбежен: поголема сиромаштија, поголемо иселување и уште подлабоко непријателство меѓу народот и власта. Тоа не е само економска, туку и политичка бомба со одложено дејство.
Подготви: Д. Тахири
Прочитајте ја оригиналната анализа од Љубомир Костовски:
ИНФЛАЦИЈА ЗА СИТЕ – ПРОФИТ ЗА МАЛКУМИНА: Сите лица и наличја на српската и македонската олигархија
