Има една шега во статистиката – ако доволно ги мачите податоците, тие ќе признаат сѐ што сакате. Изгледа ВМРО буквално ја сфатиле, па од петни жили се трудат да покажат дека имаат добри резултати кога се платите и инфлацијата во прашање, вели професорот Бранимир Јовановиќ за ЦИВИЛ Медиа, по обидите на ВМРО ДПМНЕ, со манипулација со бројки да докажува дека народот денес е побогат од времето на СДСМ.
Во продолжение, професорот Јовановиќ нуди неколку наједноставни бројки, за граѓаните да можат самите да проценат.
Просечната плата во јуни лани, последниот месец пред ВМРО да дојде на власт, беше 41,939 денари. Една година потоа, во јуни 2025, просечната плата е 45,468 денари, односно околу 3,500 денари повеќе.
Минималната плата пред ВМРО да дојде на власт беше 22,567 денари, сега е 24,379 денари, односно околу 1,800 денари повеќе.
За истото ова време – од јуни лани до јуни оваа година – минималната потрошувачка кошничка пораснала од 60,325 денари, на 64,698 денари, односно за околу 4,300 денари. Тоа е повеќе и од растот на просечната плата, и од растот на две минимални плати.
Апсолутно не може да стане збор за подобрување на животниот стандард. Или еве, ако зборуваме низ проценти. Номиналниот раст на платата во јуни лани, пред ВМРО да дојде на власт, беше околу 15%. Една година подоцна, тој се преполови, на околу 8%.
Надолниот тренд е уште повидлив кај реалната плата, односно платата коригирана за инфлацијата. Таа лани во јуни имаше раст од 11%, сега тоа е паднато на помалку од 4%.
Ако зборуваме за инфлацијата, таа лани во јуни пред ВМРО да дојде на власт беше 3.2%. Денеска, една година подоцна е скоро 5%.
И сето ова го кажувам како некој кој изминатите години постојани ги критикуваше СДСМ за тоа како тие се справуваа со инфлацијата. Така што, јас на луѓето од ВМРО би им дал еден најдобронамерен совет. Наместо да се препукуваат со СДСМ кој имал подобри бројки за инфлацијата и платите, нека преземат нешто за навистина да ги зголемат платите и да ја стават под контрола инфлацијата. А тоа најдобро можат да го постигнат со покачување на минималната плата и на платите во јавниот сектор, и со замрзнување на цените, дециден е професорот Јовановиќ.
Драган Мишев
