Земјоделецот Екрем Јаји од скопското село Арачиново денеска повторно побара институциите јавно да кажат зошто сé уште не му е исплатена отштетата вредна 10.000 евра за овошните насади уништени во катастрофалните поплави во 2016 година.
Јаји во изјава пред Министерството за земјоделство, шумарство и водостопанство рече дека ако не ја најде тука, правдата ќе ја побара во Стразбур. Како што нагласи, неколку пати побарал одговор од надлежните, но не добил, ниту бил примен кај министерот. Партиски, дополни, не е мотивиран, ниту е како било определен.
– На 10 јануари првпат дадов изјава за отштетата од 2016 година. Министерството за земјоделство прати демант преку социјалните мрежи дека со мене некој манипулира, дека лажам. Барам да се соочиме пред јавноста, за да се знае кој лаже. Јас или тие. Пред кој било медиум подготвен сум ако треба денес или утре, да седнеме и да ја кажеме вистината, но со факти, со вистински, а не со „фалс“ документи. Не сакам да манипулира со мене ниту една партија за политички поени. Јас не сум партиски определен, ниту сум бил, ниту ќе бидам, истакна Јаји.
Во скопските поплави му биле уништени околу 600 дрва, а за штетата има проценка.
– Министерството ниту ми ја плаќа отштетата, ниту ми дава решение. Велат дека ми следуваат пари, но да почекам зашто пари нема. Побарав средба со министерот, не ме примија. Отидов и во Тетово, зашто тука до него не можев да дојдам. Поставив прашање, зошто не ми плаќа, но тој не ми одговори. Сакаше да ми ги земе документите. Сакам да ја докажам правдата, луѓето да видат кој лаже, јас или Министерството за земјоделство, рече Јаји, додавајќи дека и други соселани, исто како него, не се обесштетени.
Јаји тврди и дека во текот на процедурата му е изгубен предметот за материјалната штета на куќата и шталата. – Зошто ми ја прават оваа неправда, не знам, рече земјоделецот од Арачиново.
Земјоделецот Екрем Јаји никогаш не бил спречен да влезе во Министерството за земјоделство, шумарство и водостопанство (МЗШВ). Вратите на МЗШВ се секогаш отворени за сите земјоделци. Јаји може слободно да дојде со сите документи и записници, да поднесе и жалба ако сака, за конечно вистината да излезе на виделина и да се види дали некој си поигрува и манипулира со земјоделците.
Ова е реакцијата на МЗШВ откако Јаји денеска уште еднаш изјави дека се уште не го добил обесштетувањето за поплавите во 2016 година. Јаји обвини дека никој од надлежните, ниту министерот за земјоделство не сакал да го прими и да му објасни зашто доцни исплатата. Најави и дека ако не успее тука, правдата ќе ја бара во Стразбур.
Според МЗШВ, земјоделецот Јаји пријавил несоодветен број садници во однос на големината на катастарските парцели.
– Министерството за земјоделство во рамки на своите надлежности има постапено по барањето на земјоделецот. Целокупната документација е доставена до Агенцијата за финансиска поддршка во земјоделството и руралниот развој. Од страна на Платежната агенција е утврдено дека земјоделецот има пријавено несоодветен број садници во однос на големината на катастарските парцели. Од овие причини е побарано дополнителен инспекциски надзор од Државниот инспекторат за земјоделство. Инспекцискиот надзор на парцелите е направен од страна на инспекторот Марјан Атанасов од Државниот инспекторат за земјоделство, кој сега е ангажиран во Кабинетот на дополнителниот заменик-министер Трипуновски. Меѓу другото, токму од страна на Атанасов е констатирано дека странката има и узурпирано државно пасиште кое граничи со катстарските парцели за кои бара обесштетување, а на кое има посадено соодветен број овошни садници. За ова на странката и е извршена постапка за едукација за сторен прекршок. Записникот од извршениот инспекциски надзор е пратен до Платежната агенција и тоа е една од причините поради кои сé уште не е извршена исплата на обесштетување на странката, за што се води и судски спор, објаснуваат од Министерството за земјоделство.
МЗШВ апелира да не се манипулира со земјоделците и тие да не се користат за партиско-политички цели.
– Ние сме секогаш транспарентни и отворени за комуникација со земјоделците и за решавање на секој поединечен проблем, нагласуваат од Министерството.
извор: МИА
