Собранието доцна синоќа ја утврди потребата по скратена постапка да се донесат законите за Јавно обвинителство и за Советот на јавни обвинители. Расправата за овие закони преминаа во собраниската Комисија за европски прашања и во Законодавно-правната комисија. Седницата синоќа беше закажана за во 17 часот, но почна со задоцнување од околу четири часа. Согласно со процедурите, Владата го повлече текстот на законите поради мали технички грешки и, по направените корекции, повторно го врати во собраниска процедура.
Владата донесе заклучок Предлог-законот за јавното обвинителство со тие дополнувања да биде доставен до Собранието на Република Северна Македонија. За жал, во текстот што е пратен беа направени ситни технички грешки кои се однесуваа токму на корекциите кои беа усогласени на седница на Владата и од тие причини испратениот текст на Предлог-законот за јавното обвинителство е повлечен. Владата по направените исправки повторно го достави до Собранието на Република Северна Македонија, наведе Владата во соопштението.
Законот за јавното обвинителство по прексиноќешното зелено светло од Владата вчера влезе во собраниска процедура, откако СДСМ потврди дека ја обезбедила потребната двотретинска поддршка од пратениците за негово изгласување.
Утврдениот Предлог-закон, како што посочуваат од Владата, е усогласен во претходна постапка во Собранието и во него се вградени решенија што обезбедуваат функционирање на принципот на владеењето на правото согласно европските вредности со прeдвидени услови за фер и еднаквост на страните во правосудната постапка.
Денеска започна расправата во Комисијата за европски прашања како матична комисија, а потоа законот ќе се упати за финално гласање на пленарна седница. Во нејзиното образложување министерката за правда на почеток ги исфрли обвинувањата на опозицијата пласирани и вчера и денеска на почетокот на комисијата. Дескоска тврди дека законот е утврден во Влада.
“Во Собрание бил по грешка донесен Законот со грешки, кој не бил утврден на седница на Влада. Потоа по реакција на пратениците на ДУИ потврдивме дека е поднесен погрешен текст на законот, кој текнички го повлековме и во Собрание го донесовме Законот кој бил утврден на владина седница. И затоа не е вистина дека текстот не е утврден во Владина седница”, рече Дескоска.
Седницата за Предлог-законот денеска се прекина за пратениците да учествуваат во седницата за ратификација на протоколот за НАТО. Претседателот на Комисијата, Артан Груби извести дека за законот се поднесени два амандмана.
Претседателот на СДСМ Зоран Заев денеска изјави дека раководството на ВМРО-ДПМНЕ и пратеници од оваа партија вршат притисок врз други пратеници да не се гласа за законот за јавно обвинителство. Тој вели дека кога Владата го пратила во собраниска процедура тој имал збор од 80 пратеници дека ќе дадат поддршка, но оти оттогаш се случуваат притисоци и закани кон пратениците. Дали за законот ќе биде обезбедено двотретинско мнозинство, посочи Заев, ќе се знае кога ќе треба да се гласа за него.
За притисоците и заканите против пратениците пишуваше и ЦИВИЛ МЕДИА пред два дена кога беше објавен текстот „Луѓето на Груевски и Мицкоски ги тероризираат пратениците што сакаат да гласаат за законот за ЈО“, како и колумната „Глутницата на Груевски и Мицкоски“.
Ангела Петровска
