Лидерот на СДСМ, Зоран Заев, во интервју за Прес 24, во врска со објавените снимки од пратеникот на ВМРО-ДПМНЕ, Антонио Милошоски, вели дека во објавените тонски снимки ја коментира одлуката на Врховен суд за непостапување за предметите од СЈО после јуни 2017 година, состојба со која предметите паѓаа доколку не се изгласаше Законот за јавно обвинителство.
Заев вели дека снимките најверојатно настанале на некој од состаноците во рамки на преговорите кои се водеа со групата пратениците, кои беа исклучени од ВМРО-ДПМНЕ.
„Разговорот некој од присутните неовластено го снимал додека се разговара за причините и потребата зошто треба да се донесе законот за Јавно обвинителство. Тоа се веројатно разговори од состаноците кои се водеа со претставници на партиите од власта и опозицијата од албанскиот блок на партии, кога се убедувавме и објаснувавме со групата од осум пратеници од ВМРО-ДПМНЕ зошто е важно да се донесе Законот за јавно обвинителство“, нагласи Заев.
Според него, неовластено снимениот разговор покажува зошто мораше да се донесе Законот за јавно обвинителство и покажува како со него се надминува одлуката на Врховен суд.
„Со СЈО овозможивме сите предмети да добијат правна разрешница врз основа на обезбедените докази. Се зборува дека врховните судии јасно информирале дека ќе ја донесат одлуката што тогаш ја донесоа согласно законот за СЈО каде што е предвидено дека до 30.06.2017 неовластени разговори се докази, а после може да бидат само индиции. Се друго што се слуша во објавеното неовластеното снимање од Милошоски е само аргумент плус преку убедување на соговорниците и потврда, зошто треба да се донесе новиот закон за Јавното обвинителство“, вели Заев.
Тој смета дека ВМРО-ДПМНЕ се закопала со пуштање снимки од разговори од време кога сите знаеле дека предметите на СЈО биле под закана и дека Милошоски го знае новиот закон и дека тој, Груевски и Мицкоски знаат дека предметите ќе добијат пресуди врз основа на обезбедените докази.
На прашањето дали постои можност законот за ЈО да биде оспорен од Уставниот суд, Заев истакна дека опозицијата има право да оспори закон или дел од закон пред Уставниот суд.
„На Уставниот суд е како тој ќе одлучи. Потсетувам, ова законско решение беше градено со месеци, а зад него застанаа и нашите пријатели од САД и ЕУ, како и Државниот јавен обвинител, така што јасно е уште еднаш. Раководството на ВМРО-ДПМНЕ на чело со Груевски и Мицкоски беа единствените против законот, тоа многу кажува“, вели Заев.
Во однос на претстојните избори, кои се неговите прогнози и за тоа што очекува од истите, Заев вели дека анкетите покажуваат дека на овие избори СДСМ е фаворит и дека граѓаните ја препознаваат разликата меѓу двата концепта.
„Политиките на СДСМ за интеграција, за стабилност преку членство во НАТО, за економски раст и за голема помош на сиромашните и ранливите се далеку повеќе поддржани од политиките на ВМРО-ДПМНЕ, партија која е препознаена како нереформирана, под контрола на бегалецот од Будимпешта. Концептот на СДСМ кој е за одење напред кон сигурна иднина води пред оној на ВМРО-ДПМНЕ кој е за мрачното минато“, вели Заев.
Целото интервју можете да го прочитате тука.
