Хронично болните пациенти за продолжување на нивната терапија ќе можат наместо кај лекар специјалист да одат кај матичниот лекар. Оваа е дополнителна мерка која нема да важи за новодијагностицираните пациенти. Се откажуваат сите претходно закажани интервенции на хронични пациенти кои може да се одложи, а ќе има само итни неодложни хирушки интервенции.
Ова денеска на прес-конференција во Владата го соопшти министерот за здравство Венко Филипче, кој рече дека дополнителните мерки вклучуваат кафетериите и рестораните да работат со скратено работно време до 18 часот и внатре капацитетот да биде преполовен, што значи да се задржи дистанцата од метар и пол до два меѓу луѓето кои престојуваат таму.
Додаде дека дополнителните мерки што ги предложи Комисијата за заразни болести при Министерството за здравство ќе бидат разгледани денеска на седница на Владата, а тие вклучуваат и забрана на сите јавни и приватни собири без оглед на обемот и бројот на учесници – концерти, театарски претстави, кино проекции, спортски сали, теретани, кладилници и казина.
извор: МИА
