Претседателот Стево Пендаровски, по состанокот на Советот за безбедност, изјави дека во моментов нема потреба од прогласување на кризна состојба на цела територија на државата, но не се исклучува ни таа опција. Пендаровски не гледа проблем во тоа да се одложат изборите и најави лидерска средба за утре (17 март) на тема одложување на изборите.
*
Мониторинг мисијата на ОДИХР ја откажа својата мисија и за неколку дена и физички ќе се повлече од државата, информира претседателот Пендаровски на прес конференција по состанокот на Советот за безбедност при неговиот Кабинет.
*
Министерот за здравство Венко Филипче ја информира јавноста дека денеска е потврдено присуство на коронавирусот кај пет лица, а уште две лица се дијагностицирани во лабораторија на Клиниката „Жан Митрев“, што дополнително треба да се потврди од Институтот за јавно здравје.
*
Владата вечерва одлучи да се затворат сите гранични премини во Република Северна Македонија, за премин на странски државјани, патници и возила, освен за влез и транзит на товарни возила за претставниците на димпломатскиот кор во државава, како и за други лица за кои МВР ќе даде дозвола по претходно мислење од Главниот координативен кризен штаб кој ќе потврди дека постои посебен државен или економски интерес.
*
Министерот за надворешни работи Никола Димитров вечерва апелираше граѓаните да се воздржат од патување во странство. Димитров упати порака и до оние наши државјани кои имаат регулуран статус и престој да останат во државите каде што престојуваат. Приоритет на МНР во моментов се граѓаните кои се заглавени на граничните премини во трети држави.
*
Поглаварите на верските заедници во земјава ги поздравија мерките и чекорите што ги презема Владата во справувањето со коронавирусот во насока на ефикасна заштита на здравјето на граѓаните, е заклучокот од средбата на премиерот Оливер Спасовски и директорот на Комисијата за односи со верските заедници и религиозните групи Даријан Сотировски со поглаварите на верските заедници во земјава.
*
Компанијата „Алкалоид АД Скопје“ соопшти дека во моментов работи со максимална искористеност на своите производни капацитети и човечки ресурси кои им се на располагање и направиле реорганизација на сите процеси со цел да ги задоволи барањата на македонскиот пазар за лекови, дезинфициенси, медицински алкохол, антисептици и останати средства со антибактериско дејство.
