Двете најостро спротивставени страни се во трка за обезбедување на парламентарно мнозинство. Се работи за нерамна битка, во која на едната страна е проевропската агенда, а на другата се наоѓа познатиот вокабулар според кој сè е катастрофа.
СДСМ денеска соопшти дека води сериозни преговори за формирање на влада со полн четиригодишен мандат, која ќе обезбеди прочистување на правосудството и проверка на потеклото на пари и имот на секој функционер.
Од СДСМ ветија дека борбата против криминалот и корупцијата на сите нивоа ќе биде во нивниот фокус од четиригодишниот мандат, решавајќи ги сите предмети поврзани со СЈО, обезбедувајќи прочистување на правосудството и разрешување на судиите што по извршената ревизија ќе имаат многу застарени предмети во нивните фиоки. А предуслов за тоа е, како што велат од СДСМ, веќе донесениот Закон за јавно обвинителство кој не дозволува мешање на политиката во судските одлуки.
Опозицијата, иако со два мандати помалку и тежок багаж во сферата на меѓуетничките односи, сепак, не се предава. ВМРО-ДПМНЕ продолжува со истиот вокабулар од пред изборите, па велат дека СДСМ креирале криминал, корупција и хибриден режим. Всушност, поентата на денешното соопштение на ВМРО-ДПМНЕ се сведува на барање од СДСМ да открие со кои партии ќе формира парламентарно мнозинство и кој ќе биде премиер.
Сепак, може да се постави истото прашање и до ВМРО-ДПМНЕ со кого планираат да прават Влада и дали Мицкоски ќе им биде премиер? И попатно да објаснат што подразбираат под хибриден режим. Но никој не ги прашува за тоа, па дури ни самите.
Со кого и да коалицираат, и двете најголеми партии целосно ги имаат предвид партиите од албанскиот блок. Нормално, доколку сакаат парламентарно мнозинство. На маргините од настаните, кои овие два дена се движат околу тоа кој со кого ќе коалицира и за кого ДУИ ќе се одлучи, генералниот секретар на Беса, Аријанит Хоџа, во колумна за Коха објасни дека тоа што неговата партија е дел од коалицијата Можеме, не значи дека не може и да излезе од неа. Односно, ако сите албански партии решат да влезат во владината коалиција на Зоран Заев, за здрава политика на Албанците ќе биде потребно да имаат партија и во опозиција. Е тогаш Хоџа ќе лобирал Беса да биде таа опозиција.
Во меѓувреме, тандемот Алијанса за Албанците и Алтернатива се надеваат дека ќе бидат дел од новата Влада. Африм Гаши од Алтернатива оптимистички изјави дека колку и да е нивната позиција ни таму ни ваму, тој верува дека ќе се формира добра влада во која и тие ќе бидат дел. Дури ја остави отворена опцијата Алтернатива и Алијанса за Албанците да се спојат во една партија.
За сето време, по влегувањето во Собрание, Левица молчи. По Фејсбук објавата на нивниот шеф, дека по влегувањето во Собрание, веќе нема излегување, ни збор. Очигледно, целта е постигната, па нема зошто да се мешаат политиката. И онака никој не ги игра.
Како и да е, останува помалку од една недела за да завршат преговорите, и се разбира од нивниот исход може да започнат анализите каква влада ќе има и дали таа ќе ги исполни очекувањата на граѓанките и граѓаните.
Биљана Јордановска
