пишува: ЏАБИР ДЕРАЛА
За кратко време, во низа се појавија вести од „внатрешниот круг“ на преговорите за постизборни коалиции за формирање парламентарно мнозинство и влада. „Брифинзите“ што ги добива јавноста имаат повеќекратна намена. Тоа многу зависи од страната што споделува информации, но и од тоа како медиумите „ги читаат“ тие информации. Така, кога СДСМ соопшти детали од разговорите за „евентуална коалиција“, некои тоа го протолкуваа како завршена работа.
Брифинзите (со или без наводници) имаат и силна пропагандна димензија. Дозирани или целосно извртени факти може да го деконцентрираат и ослабат „спаринг партнерот“ во преговорите. Овие денови гледаме дека ДУИ е „подновено“ со идеи како да настапуваат во јавноста, почнувајќи со пропагандниот трик пред изборите за премиер Албанец, како единствена програмска содржина. Деновиве се прославија со серијата „брифинзи“ што им ги даваат на медиумите на албански јазик. Нови изненадувања од пропагандниот кетеринг на ДУИ (и на само од нив), може да се очекуваат секој миг, до крајот на преговорите.
Првиот позначаен „брифинг“ што произлезе од кујната во Мала Речица, засилена со кулинарски експерти од странство, беше дека меѓу СДСМ и ДУИ паднал договор за двајца премиери, Македонец и Албанец, по моделот 3+1 година. Тој балон пукна за само неколку часа, но во меѓувреме создаде лавина од реакции.
Потоа дојде до средба меѓу Ахмети и Мицкоски што беше проследена со лажна вест дека ДУИ и вемеро направиле коалиција. Тоа беше демантирано неколку часа подоцна. Дури и Мицкоски се изненадил како може да направи коалиција со помалку од 61 пратеник, беше ироничниот коментар на оваа лажна вест.
Отприлика во тоа време еден од лижачите на чизми на режимот проголта огромна кнедла и напиша дека премиер Албанец и не е така лоша идеја, па кркаше лавина од негативни коментари од својата, инаку верна и тапоглава публика.
Веднаш по средбата Николовски – Груби, излезе едно многу пристојно соопштение од СДСМ во кое се претставија основните точки на разговорот и постигнатите согласности околу стратешките национални прашања и програмски определби во евентуална, нагласено беше, евентуална коалиција. Навистина, ова соопштение може да биде модел за известување на јавноста кога се работи за ваков тип на процеси зад затворени врати, иако никогаш нема гаранција дали некој намерно или ненамерно ќе ги разбере споделените информации погрешно.
По средбата Николовски – Груби излезе уште еден „брифинг“, дека ДУИ се откажало од условот за премиер Албанец, но под услов и Зоран Заев да се откаже од таа позиција. Оваа „патка“ се искористи за да се употребат и изразите како „непотребен багаж“, „афери“ и слично во медиумските прилози.
Забележливо е што „брифинзите“ со манипулативни детали и лажни вести за текот на преговорите за формирање владина коалиција прво се објавуваат во медиуми на албански јазик, а први што ги преземаат се медиумите блиски до ВМРО-ДПМНЕ. Се разбира, мамецот го загризуваат и поголем дел од другите медиуми кои по инерција и некритички ги преземаат.
Целта на ваквите медиумско-пропагандни трикови е да се манипулира со јавноста и да се постигне повисока цена во преговорите, а воедно, кога нема да се добие доволно, да се ублажи разочарувањето на сопствената публика (членство).
Да не се лажеме. Уште во текот на овие преговори се гледа дека идната владина коалиција, каква и да е, колкава и да е, ќе биде тешка и деликатна за водење. Сето тоа ќе падне врз грбот на граѓанките и граѓаните, а секако ќе се одрази и на интеграциските процеси.
