Планираната работна група на администрацијата на Бајден насочена кон обединување на децата кои биле разделени од нивните родители на границата со Мексико, како последица од политиките во ерата на Трамп, вклучува активно учество од првата дама, Џил Бајден, објави американската телевизиска мрежа Си-Ен-Ен.
Џил Бајден ќе ја организира работата на источното крило во Белата куќа со задача да преземе активна улога во проектот за повторно обединување на семејствата. Нејзиниот интерес за оваа работна група е во силен контраст со однесувањето на поранешната прва дама, Меланија Трамп, која за прв пат беше во посета на пограничен објект за деца и семејства во Тексас во јуни 2018 година.
Своевремено, посетата на госпоѓа Трамп се случи среде острата јавна полемика околу концептот на поранешниот претседател за разделување на децата од родителите во семејствата кои ја преминуваа границата со САД нелегално. Тој своевремено го промовираше принципот на нулта толеранција за мигрантите и раздели голем број деца од нивните родители во оваа кампања. Меланија Трамп тогаш се појави со јакна со натпис на грбот: „Мене навистина не ми е гајле. Тебе?“ (I really don’t care. Do U?)
Јакната на Меланија Трамп предизвика пренасочување на вниманието на јавноста, од политиката на Доналд Трамп, со што помогна да се создаде јавна перцепција за првата дама дека е незаинтересирана за ова прашање. Во интервју неколку месеци по нејзиното патување на границата, Меланија Трамп го нарече разделувањето на семејствата „неприфатливо“ и „срцепарателно“, но политиката на нејзиниот сопруг веќе го направи своето.
Претстојното учество на актуелната прва дама во ова прашање и работната група ќе дадат видливост на мисијата за повторно обединување на децата со нивните родители. Адвокатите сè уште не се во можност да дојдат до родителите на 611 деца, кои биле разделени од нивните семејства од страна на американските погранични службеници во периодот од 2017 до 2018 година. Министерството за правда, исто така, официјално ја укина политиката на Доналд Трамп во вторникот (26 јануари) во меморандумот до федералните обвинители.
Официјален претставник на Белата куќа изјави дека Џил Бајден е особено погодена од нејзиното декемвриско патување во бегалскиот камп Матаморос, Мексико, во близина на Браунсвил, Тексас.
„Тоа не нè претставува нас како Американци. Ние сме гостопримлива нација, но тоа не е пораката што ја испраќаме на границата. Велиме: Стоп. Не влегувај“, изјави таа по двочасовната посета на кампот.
Највисоки претставници на Одделот за домашна безбедност, Одделот за здравство и Стејт Департментот се очекува да ја предводат работната група, информираат изворите на Си-Ен-Ен.
Се очекува работната група да биде објавена веќе кон крајот на оваа недела.
подготви: Дескот на ЦИВИЛ МЕДИА
