Според политикологот Благојче Атанасовски, спроведувањето на пописот е неопходно и, како што вели, државата веќе има искуство со организирање масовни операции во услови на пандемија со коронавирус. Атанасовски смета дека повиците за неотворање врата се антидржавен чин, а самиот бојкот како инструмент започнале да го користат силите со безидејна политика.
-Мора да се направи оваа рентген-слика на нашето општество, особено поради масовното иселување. Потребни ни се податоците за демографските особености за да се проектира идниот развој, а критикувани бевме и во европските извештаи. Доколку се запазуваат сите мерки и протоколи нема да дојде до нагло зголемување на бројката на заразени, а тоа ни го покажа и добрата организација на минатогодишните предвремени парламентарни избори, оценува Атанасовски.
Тој сепак додава дека е голема веројатноста некоја од политичките сили да не ги признае резултатите од попишувањето и прогнозира дека тоа ќе се партиите од албанската опозиција, но не би го изненадило ваквиот потег да го направи и владејачката партија ДУИ.
-Што се однесува до сите политички опозициски сили кои повикуваат на бојкотирање на пописот, треба да се запрашаат што би сториле тие доколку се на власт? Како ќе постапат доколку тогашната опозиција реши да им го бојкотирање спроведувањето на оваа статистичка операција? До кога ќе се вртиме во круг, прашува Атанасовски. / Слободен печат
