Во учебникот по Социологија за втора година од средното образование има крајно дискриминаторска и ксенофобична содржина со етнички предрасуди и стереотипи во однос на наталитетот на помалите етнички заедници во земјава, односно за начинот на репродукција кај овие заедници.
Авторите Нелко Стојаноски, Зоран Матевски и Милева Ѓуровска посочуваат дека кај Ромите, Албанците и Турците има зголемена стапка на наталитет, заради необразованост и репродукција на стар, традиционален начин, односно без контрола на раѓањето.
Во текстот понатаму авторите „советуваат“ за преземање мерки за да се доведе наталитетот во нормални рамки.
„Република Македонија е мултиетничко општество и поради тоа постои голема хетерогеност на демографските белези во зависност од етничките својства на населението. Кај некои етнички групи постои силна тенденција да се зачува традиционалната репродуктивна свест. Со тоа и природниот пораст на населението ( наталитетот) се зголемува на оние простори во Македонија што се населени претежно со овие етнички групи. Висока стапка на раѓање имаме кај Ромите, Албанците и Турците. Голем процент од ова население, а посебно оние што не се доволно образовани се репродуцираат на стар, традиционален начин, без свесна контрола за раѓањето.
Во врска со тоа треба да се преземат мерки и треба да се најде начин наталитетот да се доведе во нормални рамки. кај оние етнички групи (Македонците), каде што природниот пораст на населението е низок, треба да се стимулира бидејќи пропорцијата на наталитетот присутен кај различните етнички групи негативно се одразува на политички, економски и социјален план“, пишува во учебникот по социологија.
Овој учебник за прв пат со решение од Министер за образование, е пуштен во употреба на 30.09.2002 година, а втор пат на 20.07. 2020 година.
Истиот учебник е ревидиран во 2019 година, по реакциите од јавноста и експертите за дискриминаторски текст што се однесува на улогата на жената во нашето општество:
„Причините за различното учество на жените во криминалитетот се објаснуваат со општествената положба на жената. Ако жената е затворена во домот и нема никакви јавни улоги, таа нема можност да прави кривични дела. Жената на тој начин е заштитена од многу комуникации, одговорности, ангажмани, натпревари, конфликти и е упатена да се грижи за семејството, а со тоа помалку е изложена на влијанието на објективните криминогени фактори. Во услови на поголема општествена активност можно е да дојде до поголема криминална активност особено кај некои видови кривични дела“ – извадок од текстот пред ревидирањето.
Овој текст во новото, ревидирано издание веќе не постои, според решение од Министерството за образование во 2019 година, но останува делот во кој се стереотипизираат етничките заедници во земјава, како што објави ТВ21.
ЦИВИЛ препорачува итна ревизија и на оваа верзија од учебникот и повлекување на сегашното издание.
Дијана Тахири
