Претседателот Стево Пендаровски денеска оствари разговор преку видео-врска со новоименуваните амбасадори на Бангладеш, Обединетите Арапски Емирати и Индонезија во земјава, по повод предавањето на акредитивните писма, кои поради пандемијата на Ковид-19, ги доставија по писмен пат.
– Во разговорот со новоименуваниот амбасадор на Народна Република Бангладеш, Мд. Дауд Али, претседателот Пендаровски упати честитки по повод 50 годишнината од независноста на Бангладеш и посочи дека и покрај географската оддалеченост двете земји негуваат традиционално пријателски односи. Претседателот Пендаровски истакна дека Република Северна Македонија е подготвена за интензивирање и јакнење на соработката со сите земји од Јужна Азија во областите од взаемна корист и интерес, соопштија од кабинетот на Пендаровски.
На средбата со новоименуваниот амбасадор на Обединетите Арапски Емирати, Омар Обаид Мохамед Алхесан Алшамси, пак, претседателот Пендаровски му посочи дека инвестициските проекти на ОАЕ во регионот позитивно влијаат на економскиот раст и изрази благодарност за помошта од ОАЕ во справување со пандемијата на Ковид-19.
– Како партнерска земја на НАТО, претседателот Пендаровски изрази подготвеност за унапредување на соработката во сферата на безбедноста со Обединетите Арапски Емирати и ја поздрави нивната конструктивна улога во обезбедувањето на стабилноста на Блискиот Исток. Во годината кога се одбележуваат 25 години од воспоставувањето на дипломатските односи, соговорниците изразија очекување дека одличното ниво на дијалог ќе продолжи со иста динамика и во иднина, рекол претседателот Пендаровски.
Во разговорот со новоименуваниот амбасадор на Индонезија, Иван Богананта, претседателот Пендаровски изрази задоволство од билатералните односи засновани на меѓусебно разбирање и пријателство, како и интерес за натамошен развој на политичкиот дијалог и унапредување на економската соработка преку инвестициските можности.
На средбата е истакната подготвеност и за продолжување на одличната соработка на меѓународен план, особено во рамки на Обединетите Нации. Етничката и културната разновидност, негувањето на толеранција и меѓурелигискиот дијалог, посочи претседателот Пендаровски, се вредности кои ги споделуваат двете земји и кои претставуваат основа за унапредување на меѓусебните контакти и размена на искуства.
На новоименуваните амбасадори претседателот Пендаровски им посака успешно извршување на должноста и изрази очекување дека нивното дипломатско искуство ќе придонесе за унапредување на билатералните односи и меѓусебната соработка.
