Регионот на учесничките на МАРРИ е регион чувствителен по многу прашања – Западен Балкан, дел од Европа, но сè уште не и дел од Европската унија. Регионалната иницијатива за миграција, азил и бегалци (МАРРИ) со својата постојана канцеларија во Скопје постои и функционира повеќе од 17 години. Години во кои покажавме дека можеме да комуницираме меѓу нас, дека можеме да соработуваме и преку конструктивна дискусија да носиме одлуки корисни за регионот.
Ова меѓу другото го истакна министерот Оливер Спасовски во своето прво обраќање на денешниот МАРРИ Форум на министрите за внатрешни работи на земјите членки на оваа Регионална иницијатива за миграција, азил и бегалци што се одржа во Подгорица, Црна Гора.
Потенцирајќи дека МАРРИ, бездруго е докажана успешна регионална приказна, успешен регионален проект кој успеа да опстои и покрај многуте премрежија, вклучително и актуелните со пандемијата од Ковид-19, министерот Спасовски нагласи дека Република Северна Македонија останува посветена на оваа иницијатива.
– Нашата посветеност ја темелиме врз фактот дека МАРРИ како регионален субјект и денес му е многу потребен на регионот. Релевантноста на МАРРИ и денес е многу актуелна, бидејќи како основна тема за работа ја има миграцијата која сама по себе е постојана. Не постои друг општествен процес кој има подолга историја, а примерите од последните неколку години, па и тие од периодот на пандемијата, покажаа дека овој процес не може да биде прекинат, истакна Спасовски, се наведува во соопштението од МВР.
Со оглед дека Република Северна Македонија и формално го презеде претседавањето со МАРРИ иницијативата во наредниот едногодишен период, министерот Спасовски презентирал дел од проектите, идеите и иницијативите што се планираат како битни за време на македонското претседавање.
– Сериозно пристапивме на процесот на осмислување на приоритети на кои би сакале да се фокусираме во текот на нашето претседавање, приоритети на чие спроведување ќе работиме како претседавачи со Иницијативата и кои што претставуваат континуитет на претходните неколку циклуси на претседавања од останатите учеснички. Сметаме дека е многу важно на овој начин да се обезбеди одржливост на идеите преточени во конкретни активности, со што на нашите партнери и донатори им кажуваме дека можат да имаат доверба во МАРРИ, во регионот на Западен Балкан, а со тоа и во секоја од учесничките поединечно, рече Спасовски.
Притоа, тој нагласи дека најголем акцент ќе стави на финализирање на процесот на изготвување нова модерна МАРРИ стратегија за периодот 2021-2024 година, а во насока на демонстрирање капацитет за развивање на среднорочни и долгорочни активности, компатибилни и флексибилни за адаптација на можните предизвици.
Според министерот Спасовски, стои во соопштението, дополнително, имајќи предвид дека во последните неколку години значително е зголемен обемот на работа на претставниците од одделите за азил, предвидено е организирање настани за претставување на најдобрите пракси од аспект на организациска поставеност на овие единици.
– Ќе го искористиме ова за присуство на претставници кои работат во полето на азилот во релевантни институции од земји членки на Европската Унија, со надеж дека некои од нивните искуства ќе бидат применливи и кај нас. Воедно, предвидовме серија активности посветени на продлабочување на соработката меѓу Регионалниот Центар и членовите на МАРРИ Комитетот и МАРРИ координаторите, како и промоција на активностите до крајните корисници во администрациите на земјите учеснички, посочи Спасовски.
Тој најави дека во фокус се става и прашањето на соработката на нашиот регион со земјите на потекло на мигрантите кои ги користат илегалните рути за движење низ нашите територии, што е една тема, истакнал Спасовски, која одамна се провлекува како потреба или горливо прашање на кое треба да му се најде одговор.
Домаќинот на Форумот, министерот за внатрешни работи на Црна Гора, Сергеј Секуловиќ, во обраќањето пред присутните истакна дека предизвиците кои се однесуваат на миграцијата, азилот и расселените лица, имајќи ја предвид глобалната безбедносна ситуација, сигурно нема да бидат помалку актуелни во времето кое доаѓа.
– Црна Гора е подготвена да ги вложи сите напори за да придонесе за создавање на цврсти политички врски и односи помеѓу соседните држави, како би можела, и на ова важно поле на делување, да биде остварена целта која нѐ приближува до интеграциските вредности и стандарди. Во таа смисла, нашите регионални иницијативи, меѓу кои и МАРРИ, веќе подолго од деценија претставуваат прилика за јакнење на врските и заедничките вредности на патот кон ЕУ, рече Секуловиќ.
Министерот Секуловиќ упати честитки до министерот Спасовски и Северна Македонија за преземањето на едногодишното претседавање со оваа иницијатива и порачал дека Црна Гора секогаш ќе биде подготвена да продолжи со активниот придонес со цел афирмација на регионалната стабилност и забрзување на интегративните процеси.
