Пет хеликоптери од кои два македонски и три српски се на пат кон пехчевскиот регион и заедно ќе го гаснат големот пожар што се заканува на околните села, изјави попладнево в.д. директорот на Центарот за управување со кризи (ЦУК) Стојанче Ангелов. Во Делчевско повторно се разгоре пожарот кај Пасјак – с.Нов Истевник, нема жртви, но потребна е секаква помош, информира градоначалникот Трајковски.
В.д директорот на ЦУК, Ангелов, информираше дека 5 хеликоптери се на пат кон пехчевскиот регион. Воедно, тој апелира на смиреност и запазување на мерките за безбедност.
„Без паника! Безбедноста на луѓето на прво место! Доколку некој е загрозен од пожарот веднаш нека се оддалечи на безбедно. Нови куќи се прават, нови дрвја ќе пораснат, изгубените животи на луѓето нема да се вратат! Затоа апелираме за запазување на мерките за безбедност. Безбедноста на луѓето на прво место!“, се вели во писмената изјава на Ангелов.
Претходно, во Пехчево заседаваше Кризниот штаб и утврди насоки на делување за справување со пожарот. Градоначалникот Драган Тренчовски изјави дека Пехчево се преземени мерки и побарана е помош за справување со пожарот.
„Лоша е стуацијата со пожарот, бидејќи се префрли и дојде во делот над селата Робово и Умлена. Пожарот е високо на шумските предели над селата, но се шири на голема површина. На терен се екипи на ТППЕ од Берово и Пехчево, како и од Шумското стопанство, Центарот за управување со кризи и ДЗС, а имаме насоки дека ќе добиеме поддршка од воздух, односно треба да пристигнат два хеликоптера. Исто така, имаме насоки дека ќе добиеме помош од соседна Бугарија од каде е испратена екипа со 25 луѓе“, информираше Тренчовски.
Во делчевскиот крај, пак, попладнево повторно се разгоре пожарот во маалото Пасјак во селото Нов Истевник. Градоначалникот на Делчево, Горан Трајковски брифираше дека со единиците на Армијата, Територијалната противпожарна единица, Македонски шуми и други лица веќе трет ден се борат со огнената стихија, која, како што оцени, е крајно сериозна, загрижувачка и веќе направи голема штета во однос на шумскиот фонд.
„За среќа немаме жртви и тоа ни беше приоритет за да ги евакуираме сите изнемоштени лица кои се наоѓаат во ова село. Ова село е од рурален тип, така што за среќа немаме жртви. Максимални сили вложуваат сите единици, сите луѓе овде коишто се и доброволци од месното население и од градот Делчево и од други институции за да ги заштитиме материјалните добра на жителите од ова село“, брифираше Трајковски.
Вкупната бројка на луѓе кои се на терен и со кои тој координира е повеќе од 250. Во утринските часови помогнале и хеликоптерски единици од Армијата, а најавена е помош од Бугарија.
„Во утринските часови имавме помош од воздух со хеликоптер на нашата Армија којшто го гасеше пожарот и очекуваме сега за некои 20-30 минути да стигнат уште два хеликоптери да пружат помош, односно оваа огнена стихија на некој начин да ја ставиме под контрола. Имаме помош од Општина Берово со противпожарни единици, стигнуваат шест противпожарни возила од соседна Република Бугарија, има помош од градоначалникот на Штип Сашко Николов со противпожарни возила“, објасни Трајковски.
Тој укажа дека пожарот не е на едно место, односно дека има пожари на повеќе од 50-ина места во оваа месност и дека е потребна секаква помош, и во однос на цистерни и во однос на човечки ресурси. Трјковски изрази уверување дека хеликоптерите ќе завршат поголема работа бидејќи, како што појасни, висока е шумата и ќе може на некој начин оваа огнена стихија со катастрофални размери да се стави под контрола. / МИА
