Пописот на населението, домаќинствата и становите во 2021 година се одвива со посакуваниот интензитет, нормално без никакви застои и без никакви проблеми. Одбивањата се незначителни и се уште не применуваме никакви санкции, туку најпрво се разговара и се надеваме дека ќе успееме овие луѓе да ги убедиме да се попишат, изјави денеска директорот на Државниот завод за статистика, Апостол Симовски.
Во однос на постоењето на негативна кампања против попишувањето, Симовски рече дека негативната кампања ја имало и ја има цело време и дека не престанува, но добро е што луѓето не наседнуваат.
– Сведоци бевме и вчера на изјави на една политичка партија, токму насочени кон тоа да се попречи спроведувањето на пописот. Меѓутоа, добрата работа е што граѓаните не наседнуваат на оваа кампања и самите податоци го покажуваат тоа, изјави Симовски.
Одбивањата, посочи Симовски, се незначителни и по разговорот со државен инструктор и член на пописна комисија тие луѓе најчесто се попишуваат.
– Не применуваме никакви санкции се уште и се надеваме дека тоа нема да се случи до крајот на попишувањето, изјави Симовски.
Државниот завод за статистика, посочи Симовски, спроведува попис долги години и има тим, што зад себе има долгогодишно искуство во оваа активност.
– Ова, мене лично ми е четврти попис во кој учествувам целосно. Главниот тим на ДЗС се искусни луѓе, кои што поминале повеќе пописи. Сите искуства од претходните пописи, и не само наши, се земени предвид при подготовката на овој попис и не очекуваме некои непредвидливи ситуации, изјави Симовски.
Единствено што не може да се предвиди, рече Симовски, е кога користите технологија дали во секој момент таа ќе функционира, бидејќи колку и да тестирате, не можете да бидете 100 проценти сигурни од самиот почеток како ќе се одвива.
– Не очекуваме натамошни проблеми, меѓутоа сме подготвени и за такви ситуации. Непредвидливи ситуации секогаш може да има, но се обидуваме да ги пресретнеме пред да се случат, а и да се случат веднаш да бидат отстранети, изјави Симовски.
Во однос на плаќањата на попишувачите, директорот на ДЗС рече дека треба да се заврши и евидентира кој колку сработил, по што сите лица ќе бидат исплатени до последниот денар.
