Се разжестува кампањата за локални избори. Веќе не се ни штедат зборови, но не за претставување на програмите, туку за навредување на противкандидатите.
РОДОВА ПОЛИТИЧКА НЕКОРЕКТНОСТ
Кандидатот за градоначалник на СДСМ, Асан Ферат, на емисија во телевизија 24, се обрати до носителката на советничка листа на ДОМ и ЛДП, Фатима Османовска, дека треба да си седи дома, да си биде домаќинка и ù посакува успех.
На ова реагира носителката на советничка листа, Османовска дека ваквиот потценувачки и дискриминорски став кон нејзе како жена и кон жените воопшто кој јавно го искажува кандидатот за градоначалник на СДСМ Асан Ферат, го покажува неговиот низок капацитет да апсорбира концепт за општество во кое жените имаат права.
„Права да бидат мајки, домаќинки, работнички, директорки, пратенички а истовремено и ПОЛИТИЧАРКИ! Срамно и жално“, пишува Османовска на нејзиниот Фејсбук профил.
ПОЛИТИЧКИ ПАРТИИ
СДСМ
Потпретседателот на СДСМ, Оливер Спасовски на митинг во Арачиново истакна дека оваа власт имаше храброст и визија да го гради концептот „Едно општество за сите граѓани“. Тој истакна дека ВМРО-ДПМНЕ е синоним на поделби и раздор, 12 години поттикнуваа меѓуетнички тензии, Арачиново во време на режимот на беше општина во која најмалку се вложуваше, општина оставена на маргините, во долгови до гуша.
„Централната власт на СДСМ помага со раздолжувањето и вложува во реални, видливи проекти, затоа што го нудиме најдоброто за секоја општина. Арачиново за прв пат добива градинка, го реновиравме старото училиште, објектот на општината, во наредниот период започнуваме изградба на пречистителна фекална станица во Арачиново, а дивата депонија ќе биде претворена во парк“, порача Спасовски, додавајќи дека во изминатиот период е изграден канализациски систем долг 10 километри, кој ги поврзува околните села Орланци, Мојанци и Грушино.
ВМРО-ДПМНЕ
Претседателот на ВМРО-ДПМНЕ, Христијан Мицкоски, на митинг во општина Бутел, истакна дека понудата на кандидати за градоначалници од СДСМ всушност се стари истрошени кадри. Повеќето стари градоначалници кои не направија ништо, а онаму каде смени по некој, задолжително тој е син на некој профитер од транзицијата кој совршено се вклопува во квалификацијата зоранчиња.
Понудата во Скопје му е реинкарнација на транзициските кадри, реинкарнација на олигархијата. Ако во деведесеттите владееше олигархијата на СДСМ, сега Заев ги става нивните деца да се борат за функции и да заработуваат на потта на работникот. Таму крадењето и пиењето на крвта од народот и заработувањето на туѓата мака станува традиција. На овие избори имаме враќање на олигархијата, едно „дежа ву“ на истите луѓе и нивните деца кои се богатеа врз грбот на народот за да повторно се богатат. Скопје ќе го правеле Струмица, клановски да се поделат за да има за таа тесна клика – нагласи Мицкоски.
НЕЗАВИСНИ
Независниот кандидат за градоначалник Максим Димитриевски, потенцираше дека општина Куманово во континуитет вложува во санација и изградба на речните корита.
„Во изминатиот период инвестиравме во уредување на речното корито на река Липковка и дел од река Кумановка, во делот кај градскиот парк и дополнително на локација Средорек. Токму поради овие инвестиции на општината, ние денеска не се соочуваме со децениските проблеми на излевање на речното корито. Вложивме и во чистење на речните корита. Барам од граѓаните да ги одржиме чисти. Ќе продолжиме со тој интензитет дополнително да ги чистиме“, рече Димитриевски.
ДУИ
Кандидатот за градоначалник на Дебар од ДУИ, Хекуран Дука, кој општината ја предводеше измнатите две и пол години, денеска ја претстави програмата со која, како што рече, ќе го однесе Дебар кон поголем развој. Додаде дека програмата предвидува постојано одржување на патната ифрастрктура, споменувајќи реконструкција на повеќе улици во градот и патни правци до повеќе населени места.
Најави поддршка за дозавршување и опремување на новиот објект на гадинката „Брешиа“, отворање центар за културно наследство-етнолошки музеј, поддршка на сите културни и спортски активности, клубови и организации.
ЦИВИЛ: ОБУКИ ЗА НАБЉУДУВАЧИ, ИЗБОРЕН РАПОРТ
ЦИВИЛ ќе одржи семинари за обука на краткорочните набљудувачи в саботи и недела (9 и 10 октомври). Околу 300 краткорочни набљудувачи ќе добијат обука за мониторинг на денот на гласањето на 17 октомври.
Изборен рапорт #13 и #14 (сабота и недела) ќе биде објавен во текстуална форма во вечерните часови. Веќе од понеделник (празнично) емисијата ќе продолжи да се емитува во видео формат, во живо. Од вторник повторно ќе има можност за вклучување на новинар(к)ите преку платформата Зум.
Презентаија на извештај од долгорочниот изборен мониторинг на ЦИВИЛ ќе се одржи во живо, на 14 октомври (четврток).
Д. Муратов
