Застапеност на психолошкото во Законот за заштита на децата на Република Северна Македонија е тема на книгата на м-р Андријана Паскоска и проф. д-р Мирослав Пендароски, долгогодишен професор и практичар во областа на психосоцијалната рехабилитација и психотерапија, промовирана пред неколку дена во Битола.
„Овај труд не само што е прв од ваков вид во нашата земја, туку е и прв од аспект на значајноста на идејата и креативниот потенцијал што трудот го носи со сите свои квалитети и предизвици. Ваквите трудови во иднина ќе придонесат за неколку цели:
– подигање на свеста за менталното здравје како дел од севокупното детско здравје;
– давање насоки за примена на законските одредби со многу поконкретни решенија, а не само воопштени флоскули кои не се доволно јасни од аспект на нивната важност за психичкиот развој на децата и задоволувањето на нивните емоционални потреби.
Поради наведените причини сметаме дека овој труд заслужува многу поголема видливост во пошироката заедница, особено стручната, а со што ќе се подобрат постоечките законски решенија и ќе се надополнат со нови идеи и прецизни законски решенија, само со една цел – подобрување на социјалната заштита на нашите деца, без кои оваа книга би била само празно слово на хартија“, вели Паскоска за ЦИВИЛ Медиа.
Книгата е екстензија на магистерскиот труд на авторката Паскоска, одбранет на Меѓународниот славјански универзитет „Гаврило Романович Державин“.
Д. Муратов
