Руската воена инвазија врз Украина, можните импликации од војната врз сојузниците, безбедносните ризици и идната одбранбена поставеност на НАТО, како и претстојниот самит на лидерите на Алијансата во Мадрид, ќе бидат во фокусот на разговорите на дводневниот на министрите за надворешните работи на земјите членки на НАТО што денеска и утре ќе се одржи во Берлин, а на кој ќе учествува и шефот на дипломатијата Бујар Османи, пренесува МИА.
На состанокот се поканети да учествуваат и министрите за надворешни работи на Финска и Шведска, кои ќе информираат за најновиот развој на настаните, придобивките и импликациите врзани со можното идно членство на овие две земји во Алијансата.
Како што соопшти МНР, на маргините на состанокот се очекува Османи да оствари билатерални средби со министрите за надворешни работи на Украина, Дмитро Кулеба и на Црна Гора, Ранко Кривокапиќ, како и со други колеги учесници на средбата.
Министрите за надворешни работи на земјите членки на НАТО овој викенд ќе се состанат во Берлин за да разговараат за долгорочна стратегија за Русија и можниот влез на Финска и Шведска.
Геополитичкото влијание на НАТО нагло се зголеми по руската инвазија на Украина и наскоро би можело да добие нови членки.
Владејачката Социјалдемократска партија во Финска денеска ќе го објави својот став за евентуалното пристапување во НАТО. Финскиот државен врв во четвртокот објави дека Финска мора да поднесе барање за членство во НАТО „без одлагање“.
Шведските владејачки социјалдемократи во недела треба да одлучат дали ќе се откажат од децениското противење на членството во НАТО, што речиси сигурно ќе доведе до тоа Шведска да побара членство во Алијансата.
Шефовите на шведската и финската дипломатија Ен Лиде и Пека Хаависто треба да присуствуваат на состанокот на НАТО.
Данска, Норвешка и Исланд се членки на НАТО од неговото основање.
Москва вели дека проширувањето на НАТО со Финска и Шведска ќе биде непријателски гест и ќе претставува дополнителна закана за нејзината безбедност, поради што најави дека ќе одговори на тој потег.
Кандидатурата на Финска и Шведска треба да биде одобрена од сите 30 земји.
Турскиот претседател Реџеп Таип Ердоган во петокот рече дека членството на Финска и Шведска во НАТО ќе биде „грешка“.
Дводневниот состанок, чиј домаќин е германската министерка за надворешни работи Аналена Бербок, а на кој ќе присуствува и американскиот државен секретар Ентони Блинкен, ќе го означи почетокот на последната фаза од преговорите за Стратешкиот концепт на НАТО, документ кој ги поставува насоките за иднината.
Концептот треба да овозможи долгорочен одговор на растечките тензии со Русија, вклучително и појаснување за тоа како да се врати влијанието на НАТО во Источна Европа во иднина и, за првпат, насоки за Кина.
Конечната верзија на документот треба да биде усвоена од лидерите на НАТО на самитот во Мадрид во јуни.
