Што им порачаа на властите читателите на ЦивилМедиа во пораки на Граѓанскиот форум, во петокот ( 26 мај, 2025)?
Во продолжение ќе наведеме неколку од бројните пораки од граѓанките и граѓаните, а како што ќе прочитате, една од пораките се повторува на секој Граѓански форум, а таа е „Да си одат!“ ( мислат на власта, секако).
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
Се повтори и пораката политичарите да го поништат законот за зголемување на нивните плати од 78 отсто, да се укине апанажата, да се намалат маржите во маркетите и да се замрзнат цените, и да се зголемат платите во приватниот сектор.
– Влез во ЕУ, таму ни спасот.
– Да почнат преговори во ЕУ и да исчезнат.
– Функционерите на власта на чело со Мицковски не се дораснати на функциите кои ги заземаат, тешко на народот со нив.
Според пораките, граѓаните сметаат дека со членство во ЕУ, ќе се подобрат работите во земјата, и бараат да се отпочнат преговорите час поскоро.
Расчистување на криминалот, ред и законитост за сите, за невработените со факултет да се започне акција за вработување, се дел од пораките.
– Влез во ЕУ, и да не се прават патриоти на наш грб. Еден ден нема да издржат да се на местото на обичниот граѓанин.
Незадоволството на граѓанките и граѓаните од политиките на власта е повеќе од очигледна, тие јасно и без задршки ги артикулираат своите пораки до нив.
„Граѓански форум“ е простор во кој секој петок, како завршница на прашањата на денот, граѓаните без задршки имаат можност преку коментари да испратат пораки, искуства но и критики до властите, институциите, политичарите, а според досегашните одговори, тие тоа го прават на јасно артикулиран начин, со директни пораки и сугестии.
Редакцијата на ЦивилМедиа е отворена за граѓанките и граѓаните не само во петок, туку и секој ден од неделата, да споделат свои пораки, прашања, грижи и искуства, било во коментари или во пораки, и им заблагодарува за довербата, отвореноста и директниот настап. Ве очекуваме секој ден, а во специјализиран простор – секој петок во Граѓанскиот форум.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Т.
