Републичката изборна комисија (РИК) на Србија одлучи да се повтори гласањето на 53 избирачки места на 1 ноември, по предвремените парламентарни избори одржани на 25 октомври. Повторното гласање ќе се спроведе од 07:00 до 20:00 часот, а до завршувањето на постапката останува отворено прашањето за конечните изборни резултати и распределбата на пратеничките мандати.
Според одлуката на РИК, на 31 избирачко место не било можно да се утврдат резултатите од гласањето, додека на 22 избирачки места гласањето било поништено. За повторното гласање се предвидени 24.438 гласачки ливчиња, за исто толку запишани гласачи.
Според прелиминарните податоци на РИК, по обработката на 97,56 отсто од избирачките места, студентската листа „Студентите победуваат“ освоила 2.267.615 гласови, односно 52,71 отсто. Листата „Александар Вучиќ – Обединета Србија“ добила 1.685.022 гласа, односно 39,17 отсто.
Во тогашната прелиминарна распределба, студентската листа имала проектирани 140 пратенички места, а листата предводена од Вучиќ 104 места.
Српското Собрание има 250 пратеници, а за парламентарно мнозинство се потребни најмалку 126 мандати. Според прелиминарната распределба, студентската листа е над тој праг, но конечниот состав на парламентот ќе биде познат по завршувањето на изборната постапка.
Изборите се одржаа на 25 октомври, а според прелиминарните податоци, излезноста изнесувала 68,78 отсто.
Според изборните и парламентарните правила во Србија, конститутивната седница на Собранието треба да се одржи најдоцна во рок од 30 дена од објавувањето на конечните резултати. По конституирањето на парламентот, започнува рокот за избор на нова влада, кој изнесува 90 дена.
Србија истовремено се соочува и со промената на претседателската функција, откако Александар Вучиќ поднесе оставка на 27 септември. По неговото повлекување, претседателската должност ја презеде претседателката на Собранието, Ана Брнабиќ, во својство на вршителка на должноста претседателка.
Б. Ј.
ЦИВИЛ МЕДИА
ПОДДРШКА ЗА ЦИВИЛ. ДОНИРАЈТЕ ДЕНЕСКА.
Ако го цените тоа што го прави ЦИВИЛ, поддржете ја нашата работа.
Вашата поддршка ни овозможува да известуваме, да ја одржуваме платформата за демократски дијалог, да објавуваме едукативни содржини, да се бориме против лагите и да ги браниме човековите права и слободата.
Поддржете го ЦИВИЛ. Донирајте ДЕНЕСКА.
