Специјалниот претставник на Европската унија за дијалог меѓу Белград и Приштина, Мирослав Лајчак денеска соопшти дека Косово и Србија во Брисел го усвоиле Патоказот за имплементација на енергетскиот договор, јави дописникот на МИА од Белград.
-Со големо задоволство можам да соопштам дека Косово и Србија штотуку усвоија патоказ за имплементација на енергетските договори во рамките на дијалогот со посредство на ЕУ. Ова е голем чекор напред, напиша Лајчак на Твитер.
Very pleased to announce that Kosovo and Serbia just adopted the Energy Agreements’ Implementation Roadmap in the framework of the EU-facilitated Dialogue. This is a major step forward. pic.twitter.com/QbY3W7uyrs
— Miroslav Lajčák (@MiroslavLajcak) June 21, 2022
Тој го објави и патоказот за спроведување на енергетските договори, кој има девет точки.
-За надминување на кризата и проблемите во енергетскиот сектор, а имајќи ги предвид договорите за енергетика од 8 септември 2013 година и заклучоците на посредниците на ЕУ за имплементација на енергетскиот договор од 2013 година од 25 август 2015 година, страните се договорија за патоказот, се наведува во документот.
Жителите на четири општини во северно Косово – Северна Митровица, Лепосавиќ, Звечан и Зубин Поток – од кои повеќето се припадници на српската заедница, не ги плаќаат сметките за струја повеќе од две децении.
Во 2013 година Косово и Србија постигнаа договор за енергетика во рамките на дијалогот за нормализација на односите, а потоа во 2015 година беа договорени заклучоците. Според тие договори, наплатата на струјата на северот требаше да ја врши фирмата „Електросевер“, која никогаш не беше формирана.
Според податоците на Косовскиот оператор на електропреносен систем (КОСТТ), загубите само во 2021 година достигнале 40 милиони евра.
Косовската компанија за дистрибуција на електрична енергија (КЕДС), која е управувана од турски конзорциум од 2013 година, има ексклузивни овластувања за дистрибуција на електрична енергија низ Косово, за управување и одржување на теренските средства.
Информацијата ја потврди косовскиот главен преговарач во дијалогот со Србија, вицепремиерот задолжен за евроинтеграции Бесник Бислими. Тој објави дека Косово и Србија денеска конечно постигнале договор од областа на енергетиката.
Бислими на Твитер напиша дека со овој договор ќе се овозможи наплата на сметките за струја и во четирите општини со мнозинско српско население во северно Косово, што досега главно не се спроведуваше.
– Најпосле го усвоивме Прирачникот за имплементација на договорите за енергетика од 2013 и 2015 година. Ова овозможува наплата на сметиките за електрична енергија во четирите општини во северно Косово, според косовските закони и регулативен систем, напиша Бислими.
We finally adopted the Implementation Roadmap on Energy Agreements of 2013 & 2015. This enables billing of electricity in 4 Northern Municipalities of Kosova, under Kosova laws and regulatory system. pic.twitter.com/39xvPCB1Ym
— Besnik Bislimi (@BislimiBesnik) June 21, 2022
Договорот е постигнат на денешната средба во Брисел на Бислими, српскиот главен преговарач, Петар Петковиќ и посредникот на Европската унија во дијалогот меѓу Приштина и Белград, Мирослав Лајчак, кој исто така преку Твитер изрази задоволство за постигнатиот напредок во дијалогот.
