Мицкоски пред неполна година за српска Политика изјавуваше дека Отворен Балкан е добра можност за олеснета комуникација на земјите од регионот, а деновиве сосема спротивно се чуди како можеле да соработуваат две земји што не се граничат (Албанија и Србија) и дека немал информации за иницијативата, реагира во објава на Фејсбук Нора Исмајлоска Старова, Национална координаторка за регионална соработка и европски интеграции.
„Во меѓувреме, Отворен Балкан порасна, се отворија зелени ленти за брз проток на камиони на границите, се организираше врвен регионален Саем за вино, храна и туризам и се оформија кризни групи за помагање во снабдувањето со храна и енергија за што секојдневно известуваат медиумите, ама ете Мицкоски одлучил дека не е информиран и дека немало да даде поддршка за Отворен Балкан“, истакнува Исмајлоска Старова.
Таа вели дека намерата е очигледна, да се кочи и блокира.
„Со ратификација на договорите кои ги блокира, граѓаните на Северна Македонија, Србија и Албанија ќе добијат можност да работат во која било од трите држави без да вадат работни дозволи, без какви било бариери, без аплицирања и чекања, без административни трошоци“, нагласува Исмајлоска Старова.
Исмајлоска Старова набрајува информации за иницијативите и придобивките од Отворен Балкан, како што вели – Иницијативата со најголема поддршка од граѓаните на регионот
- Побрз проток на стоки преку признавање на авторизираните економски оператори и взаемното признавање на ветеринарните сертификати. Сигурно секој познава барем еден сопственик на компанија од многуте задоволни. Со ова овозможивме побрз проток на стоки. За уште подобри резултати потребна е ратификација на договорот кој е заглавен во Собрание.
- На Саемот за вино, храна и туризам 42 винарии, 3 дестилерии, 10тици производители на храна, дел од најдобрите македонски готвачи имаа можност за промоција на македонскиот квалитет. Имаа бројни состаноци кои носат потенцијал за извоз и нé направија горди со многу награди и пофалби кои ги добија.
- Бројките во туризмот растат. Следуваат уште квалитетни проекти од таа област.
- Соработката помеѓу институциите на трите држави е на одлично ниво, професионална и пријателска. Вклучени се луѓе кои се експерти.
- Со OB ID ќе ја отвориме можноста за слободно движење и пристап до пазарот на трудот. Идентификациониот број ќе се користи и за низа други поволности во иднина.
- Даночните управи разменуваат искуства и најдобри пракси за сите да напредуваат и бидат поквалитетни за граѓаните.
- Имаме договор за брза реакција во случај на природни катастрофи
- Вчера се договори Отворен Балкан театарски фестивал а, има договор за соработка и во кинематографијата и визуелните уметности.
- Најавуваме поглавје заеднички да привлекуваме инвестиции 10. Млади, можности, нови хабови, нови бизниси, нови убави вести
Исмајлоска Старова истакнува дека регионалната соработка е важен сегмент за развојот на македонските потенцијали и побрза европска интеграција.
Регионалната соработка не е врзана со граници меѓу две држави како што е неговата дилема, туку е начин за зближување и напредок, потенцира Националната координаторка за регионална соработка и европски интеграции.
Извор: frontline.mk
