Европската комисија ја одобри првата голема инфраструктурна програма за Бугарија за периодот 2021-2027 година. Официјален Брисел за програмата „Транспортно поврзување“ ќе ѝ додели на Бугарија 1,61 милијарда евра. Еден од најважните инфраструктурни проекти коишто треба да се градат е железничката пруга по коридорот Ориент/Источен Медитеран, односно Коридорот 8, пишува money.bg.
Како што пренесува Мета, Бугарија најдоцна до 2027 година ќе треба да ја изгради и да ја рехабилитира железничката пруга од Ѓуешево на македонско-бугарската граница преку Ќустендил, Перник и Радомир до Софија. На тој начин, ќе се овозможи до овој временски период целосно да се заврши изведбата на железничката пруга меѓу Софија и Скопје и да се овозможи патнички и товарен железнички превоз меѓу двете земји.
Ваквата одлука на ЕУ доаѓа откако летово беше потврдено дека и Македонија ќе добие дополнителни неповратни средства во висина од 149,2 милиони евра за изведба на секцијата од Крива Паланка до Деве Баир, како трета фаза од изградбата на пругата кон Бугарија. Проектната документација за оваа фаза веќе е комплетирана, а македонската влада во наредниот период треба целосно да ја дооформи финансиската конструкција за секцијата од Крива Паланка до Деве Баир.
Македонската влада летово ги потпиша и договорите со австриската компанија „Штрабаг“ и турската фирма „Ѓулермак“ за изведба на првата фаза (Куманово-Бељаковце) и втората фаза од пругата кон Бугарија (Бељаковце-Крива Паланка). Овие две фази ќе треба да се завршат до 2025 година, а нивната вкупна вредност изнесува 200 милиони евра.
