Жирито на регионалниот конкурс за краток расказ „Бибер“, во состав Калина Малеска, Лејла Каламујиќ и Оља Савичевиќ Иванчевиќ, донесе одлука за наградите и избра 25 раскази кои ќе бидат објавени во повеќејазичниот зборник.
„Бибер“ е конкурс за краток, ангажиран расказ на албански, македонски, босански, хрватски, српски и црногорски јазик. Петтиот конкурс „Бибер“ беше отворен од 10.12.2021 до 1.6.2022. На конкурсот стигнаа вкупно 473 дела (387 на БХСЦ јазик, 69 на македонски и 17 на албански јазик). Темата на конкурсот е помирување во контекст на заоставштината на војните и насилството во земјите на поранешна Југославија, а доаѓаат предвид и раскази кои можат да придонесат за подобро разбирање меѓу луѓето, намалување на омразата и разградување на предрасудите, антивоени раскази, раскази кои се занимаваат со соочување со минатото, разградување на сликата за непријателите, сочувство за другите, храбри раскази кои се осмелуваат да одат во чевлите на „непријателот“, раскази кои ги поместуваат границите и ни отвораат патишта да градиме поизвесна, побезбедна и послободна иднина за сите. Конкурсот го организира тимот „Бибер“ на Центарот за ненасилна акција Сараево-Белград.
По извршената претселекција, жирито едногласно одлучи првите три награди да им се доделат на следните раскази „Доба на митарење“, на авторката Ана Кутлеша, прва награда, „Фертик“, на авторката Лидија Дедуш, втора награда и трета награда за „Земја на среќата“, на авторот Анте Сториќ и „Зборови“ на авторот Милош Перишиќ.
Годинашниот избор на раскази тематски се движи од отворено соочување со болното минато (често прикажано од перспектива на децата и младите, што е очекувано со оглед на генерациската припадност на авторките и авторите) до некои нови предизвици кои ги носи современоста. Позитивен впечаток ни остави храброста искажана во голем број раскази – обидот „да се оди во туѓи чевли“; пишувањето од перспектива на „онаа друга страна“, било таа перспектива да припаѓа на друг род, светоглед, националност или генерација.
